Bul qalada júrgizilgen «Túngi qaladaǵy balalar» is-sharasynyń nátıjesi.
Almatyda 12 qańǵybas bala arnaıy beıimdeý ortalyǵyna ornalastyryldy, – dep habarlaıdy Almaty-akshamy.kz Polisia.kz-ke silteme jasap.
«Sharanyń maqsaty – kámeletke tolmaǵandar arasyndaǵy quqyq buzýshylyqtyń, qaraýsyzdyqtyń aldyn alý jáne boldyrmaý, túngi ýaqytta kámeletke tolmaǵandardyń oıyn-saýyq mekemelerinde jáne úıden tys jerlerde zańdy ókilderinsiz júrý faktilerin anyqtaý, sondaı-aq, kámeletke tolmaǵandardy qoǵamǵa qarsy áreketterge tartatyn eresekter, balalardyń tárbıesine nemquraıly qaraıtyn ata-analar, sonymen qatar balalar eńbegin paıdalaný faktileri, kámeletke tolmaǵandarǵa alkogól men temeki ónimderin satý faktilerin anyqtaý, – dedi Almaty qalalyq PD JPQB ıývenaldy polısıa bóliminiń bastyǵy Janna Shonjanova.
İs-sharanyń tórt kúninde 295 jasóspirim ishki ister organdaryna túrli quqyq buzýshylyqtar úshin jetkizildi, sonyń ishinde ákimshilik quqyq buzýshylyqtar úshin – 281, qaraýsyz qalǵany jáne panasyzdyǵy úshin 14, onyń ishinde qaraýsyz qalǵan 12 bala qıyn ómirlik jaǵdaıdaǵy balalardy qoldaý ortalyǵyna ornalastyryldy. Jeti jasóspirim jáne toǵyz qolaısyz otbasy anyqtalyp, esepke alyndy.
«Sonymen qatar 272 ata-ana kámeletke tolmaǵan balalarynyń oıyn-saýyq mekemelerinde jáne úıden tys jerlerde zańdy ókilderinsiz júrgeni úshin ákimshilik jaýapkershilikke tartyldy. Túnde zańdy ókilderinsiz oıyn-saýyq mekemelerine kirgizgeni úshin oıyn-saýyq mekemeleriniń úsh laýazymdy adamy ákimshilik jaýapkershilikke tartyldy. Sondaı-aq alkogól ónimderin satýdyń segiz faktisi, úsh temeki ónimderi jáne kámeletke tolmaǵandar túnde daıashy bolyp jumys istegen eki oıyn-saýyq mekemesi anyqtaldy. Ata-analar úshin baqylaýdyń jetkiliksizdigi jasóspirimderdiń quqyq buzýshylyqqa barýyna nemese olarǵa qarsy zańsyz is-áreketter jasaýyna ákelýi múmkin ekenin bilýi jáne túsinýi mańyzdy, sondaı-aq olardyń tárbıesi úshin jaýapkershilikti umytpaý kerek», – dedi Janna Shonjanova.