«Aqyldy qala» qurý: Shenchjen qalasy merıasynan delegasıa Almatynyń damý ortalyǵyna bardy
Almaty qalasyn damytý ortalyǵyna Shenchjen qalasy merıasynan delegasıa kelip, qalalar arasyndaǵy sıfrlyq transformasıa jáne «aqyldy» qalalardy damytý salasyndaǵy yntymaqtastyqty nyǵaıtý maqsatynda kezdesý ótkizdi, dep habarlaıdy aqshamnews.kz
Shenzhen Urban Transportation Planning and Design Research Center Co (SUTPC) kompanıasynyń dırektory Ian Chýanvenniń aıtýynsha, sońǵy jyldary Shenchjen basshylyǵy «aqyldy» qalalardy damytý jáne qurýǵa basa nazar aýdaryp keledi. SUTPC osy saladaǵy jetekshi kompanıa bolyp tabylady jáne «Smart sıtı» tujyrymdamasy aıasynda ǵylym men tehnologıa salasyndaǵy kóptegen marapat ıelenip, 300-den asa ónertabysqa patent alǵan.
Búginde SUTPC jobalaryna sıfrlyq egizderdi, bultty jelilerdiń sıfrlyq platformalaryn, azamattarǵa memlekettik qyzmettiń san túrin usynatyn i-Shenzhen qosymshasyn ázirleý; sondaı-aq Big data men jasandy ıntellektti qoldana otyryp, túrli qalalyq júıelerdi modeldeý, damytý jáne biriktirý kiredi. Bul baǵyttardy damytý ekonomıkalyq ósýdi, energıa tutynýdy jáne qurylys shyǵyndaryn azaıtýdy, qoǵamdyq qaýipsizdikti arttyrýdy jáne tótenshe jaǵdaıǵa qalalyq ákimshiliktiń áreket etý jyldamdyǵyn arttyrýǵa yqpal etedi. Ian Chýanven Shenchjendegi tótenshe jaǵdaılarǵa den qoıý jyldamdyǵy 30%, energıa tutyný kólemi 10% tómendegenin, al qurylys shyǵyndary 30% azaıǵanyn atap ótti.
Almaty qalasy Sıfrlandyrý basqarmasynyń basshysy Oljas Jańabek áriptesterine Almaty qalasyn damytý ortalyǵymen, qala ákimdiginiń jobalyq keńsesimen jáne basqa da tıisti basqarmalarmen birlesip júzege asyrylyp jatqan qalalyq jobalar týraly aıtyp berdi. Atap aıtqanda, bul Almaty qalasynyń bolashaq sıfrlyq egizin qalyptastyrýǵa negiz bolatyn ınjenerlik jelilerdi túgendeý jónindegi joba. Túgendeý barysynda alynǵan derekter keıin «aqyldy» qalanyń qańqasyna aınalady.
«Almaty qalasyn damytý ortalyǵy» AQ sıfrlandyrý jónindegi basqarýshy dırektory Rýslan Barmashev qonaqtarǵa qalalyq aqparattyq júıelerden jáne ashyq derekkózderden alynǵan aqparatty jınaqtaýǵa, óńdeýge jáne taldaýǵa múmkindik beretin, basqarýshylyq sheshimder qabyldaýǵa kómektesetin derekter taldamasyn qurýǵa, sondaı-aq qala ómiriniń barlyq salasyn baqylaýǵa arnalǵan baǵdarlamalyq quraldardyń paıda bolýyna kómektesetin «Almaty qalasynyń Ahýaldyq ortalyǵy» aqparattyq júıesin usyndy.
Ol qaýipsizdik, kólik, ınklúzıa, bilim berý, densaýlyq saqtaý jáne ekologıa boıynsha modýlderdi tanystyrdy. «Qaýipsiz qala» jáne áleýmettik salaǵa erekshe nazar aýdaryldy.
Shenchjen qalasy merıasynyń ókilderi osy jobalarǵa qyzyǵýshylyq tanytyp, qoldaý kórsetýge jáne keńes berýge daıyn ekenin bildirdi.