Mamandardyń aıtýynsha, 85 paıyzǵa jóndeý jumystary aıaqtaldy
5 jyl boıy salynǵan jol 5 aı ótpeı búlinip jatyr. Kólik júrgizýshileri jaqynda ǵana qoldanysqa berilgen Altyn Orda bazary mańyndaǵy tas joldyń sapasy syn kótermeıdi dep ashýly, dep habarlaıdy Almaty-akshamy.kz Almaty.tv-ge silteme jasap.
Jańa asfálttiń julym-julymy shyqanyn aıtqan jurt jaýapsyz merdiger kompanıa ókilderine narazy.
Toǵyz joldyń toraby sanalǵan bul tranzıttik dálizden kúnine shamamen 18 myń kólik qalaǵa kirip shyǵady. Biz turǵan Almaty-Qaskeleń tas jolynyń bir bóligi ótken jyly jeltoqsan aıynda paıdalanýǵa berilgen edi. Arada 6 aı ótse de jol qurylysy tolyq daıyn emeske uqsaıdy. Sebebi ózderińiz kórgendeı kópir ústinde qurylys jumystary tolastar emes.
Kúrdeli aınalma joldy salýdaǵy negizgi maqsat - kólik keptelisin azaıtý. Respýblıkalyq mańyzy bar bul tas joldyń boıynda kólik aǵyny kóp. Júrgizýshiler estakada qoldanysqa berilse de, keptelisten kóz ashpadyq dep otyr.
«QazAvtoJol» Ulttyq kompanıa ókildiginiń aıtýynsha, aınalma jolǵa ketken qarjy 8 mlrd teńge. Bul respýblıkalyq búdjetten alynǵan.
Al jaýapty sala mamandary kólik júrgizýshileriniń shaǵymyna qatysty alańdaýǵa esh negiz joq dep otyr. Qazir kópir ústiniń asfált-beton jamylǵysy qaıta tóselip jatqanyn aıtty. Qurylys jumystary Raıymbek batyr kóshesine deıin jalǵasady eken. Ol úshin kólik qozǵalysy toqtamaıdy. Tas jol tóseý jumystary jol jabylmaı-aq júrgiziledi.
«Jeltoqsan aıynda paıdalanýǵa berilgen tas jol tolyq aıaqtalǵan joq. Altyn Orda bazary mańynda kólik aǵyny kóp bolǵandyqtan ýaqytsha ashtyq. Qazir 85 paıyzǵa jumys aıaqtaldy. Qalǵanyn kúzge deıin tolyq aıaqtap tapsyramyz», – dedi «QazAvtoJol»UK» AQ Almaty oblystyq fılıaly dırektorynyń orynbasary Nurjan Tańatarov.
«QazAvtoJol» Ulttyq kompanıasy ókilderiniń aıtýynsha, kúz mezgilinde tolyq aıaqtalatyn Altyn orda joly 25 jylǵa deıin shydas beredi eken. Budan keıin tas jolǵa qatysty eshqandaı másele bolmaıdy dep sendirdi. Eske salaıyq, 2017 jyly bastalǵan jol qurylysy 2019-da aıaqtalyp, tapsyrylýy kerek edi. Merdiger kompanıalardyń jaýapsyzdyǵy men jer telimderin satyp alýǵa baılanysty qurylys áli kúnge deıin saǵyzsha sozylyp keledi.