Medısınalyq bólim jumysyn bastady
Smart Health University City senimgerlik basqarýyndaǵy Almaty qalasynyń №1 qalalyq klınıkalyq aýrýhanasynda juqpaly akýsherlik bólim ashyldy, dep habarlaıdy Almaty-akshamy.kz QazAqparatqa silteme jasap.
Aýrýhananyń basqarma tóraǵasy Ernest Qalıevtiń aıtýynsha, qaladaǵy epıdemıologıalyq ahýaldyń nasharlaýyna baılanysty bıylǵy jyldyń 20 qańtarynan bastap, juqpaly akýsherlik bólimshesi ashyldy.
«Akýsherlik bólim júkti áıeldermen, bosanǵan áıeldermen jáne 22 aptadan 36 aptaǵa + 6 kúnge deıingi júktilik kezinde koronavırýs ınfeksıasy bar bosanatyn áıeldermen jumys isteıdi. 80 tósek-orynmen jabdyqtalǵan, onyń ishinde eresekterge arnalǵan 8 reanımasıa tósegi jáne bólek akýsherlik operasıalyq bólmesi, jańa týylǵan nárestelerge arnalǵan 6 kereýettik reanımasıa bólimi bar. Bosaný bólimshesin qamtamasyz etý men jabdyqtaýǵa Almatydaǵy barlyq perzenthanalar men kópsalaly aýrýhanalar úlken kómek kórsetti», - dedi Almatydaǵy №1 qalalyq klınıkalyq aýrýhananyń basqarma tóraǵasy, bas dárigeri Ernest Qalıev.
Aýrýhanada kompúterlik tomografıa, últradybystyq dıagnostıka, spırografıa júrgiziledi. Emdeý mekemesi ortalyqtandyrylǵan medısınalyq ottegimen qamtamasyz etilgen. COVID-19 juqtyrǵan júkti áıelder men olardyń jańa týǵan náresteleri mamandandyrylǵan kómekke muqtaj bolýy múmkin jáne №1 qalalyq klınıkalyq aýrýhananyń akýsherlik bólimshesi olardyń mundaı kómekti alýyn qamtamasyz etedi. Akýsherlik bólimshesiniń basshysy Sáýle Qabylovanyń aıtýynsha, Almaty qalasynyń barlyq perzenthanasy men densaýlyq saqtaý mekemesi, 3-shi deńgeıli perınataldyq kómekti (ıaǵnı, shala týylǵan óte jas náresteler men aýyr júkti áıelder men bosanǵan áıelderge) uıymdastyrýǵa jan-jaqty kómek kórsetti.
« Koronavırýs júkti áıelderdiń merziminen buryn bosanýyna ákelýi múmkin. Sonymen qatar, COVID-19, ásirese, júkti jáne jańadan bosanǵan áıelderge tán stress pen alańdaýshylyq deńgeıin arttyrady jáne osyndaı kezde medısına mamandary júkti áıelderdiń qajettilikterine jaýap berýde saýatty jáne jaýapty bolýy kerek ekendigin eskerý mańyzdy», - deıdi Sáýle Qabylova.