İs-sharany Qoǵamdyq damý basqarmasynyń «Civil Center Almaty» memlekettik áleýmettik tapsyrys jobasyn iske asyrý aıasynda «Aqparattyq-resýrstyq ortalyq» QQ ótkizdi.
Atalǵan joba úkimettik emes uıymdardyń (ÚEU), memlekettik organdar men jergilikti ózin-ózi basqarý komıtetteriniń tıimdi ózara is-qımylyn damytý, yntymaqtastyǵyn keńeıtý maqsatyn kózdeıdi, dep habarlaıdy aqshamnews.kz
Basqosýǵa jergilikti atqarýshy, bilim berý men quqyq qorǵaý organdary qyzmetkerleri qatysty. «Ashyq esik kúni» – bul ÚEU-ǵa qoǵammen baılanys ornatý, ony tereńdetý, maqsatty topqa (halyq) úkimettik emes uıymdardyń qyzmeti jóninde habardar etý men olardyń mańyzdy jumysyn qoldaýǵa tamasha múmkindik. Jetekshi qoǵamdyq qorlardyń spıkerleri qor qyzmetiniń uıymdastyrylýy, áleýmettik máseleni sheshý jolyn áńgimeledi.
Jıynda osy máselelerge baılanysty qalamyzdaǵy kóptegen qoǵamdyq qordyń nendeı sharýamen aınalysatyny naqtyly aıtylyp, kórsetildi. Bul kúni adamdarǵa qorlardyń jumysyn ishten kórýge múmkindik berildi. Árbir qormen mindetti túrde tanysyp, qalamyzdyń tynys-tirshiligin jaqsartý oraıynda birlesken ári paıdaly tájirıbe jınaqtaý úshin ózara baılanys ornatý qajet. Almatylyq komersıalyq emes uıymdar óz kezeginde aýdannyń jergilikti memlekettik qurylymdarynyń ókilderimen jaqynyraq tanysyp, bilisti, keńes aldy.
«Búgingi Áýezov aýdany Komúnıtı ortalyǵy alańyndaǵy ÚEU uıymdastyrǵan «Ashyq esik kúnindegi» bizdiń mindet – jergilikti atqarýshy bılik organdaryna, quqyq qorǵaý organdary men úkimettik emes uıym ókilderine áleýmettik mańyzdy máselelerdi sheshýde ÚEU kórsetetin qyzmet kórsetýlerdi túsindirý. Biz búgin «Baqytty otbasy», «Belsendi ómir súrý», «Narkostop», «Ekologıalyq tárbıe», «Turmystyq zorlyq-zombylyqtyń aldyn alý», «Áıelder men balalardy zorlyqtan qorǵaý quqyǵy» men lýdomanıa jónindegi máselelerdi, túrmeden bosatylǵan áıelderdiń áleýmettik máselesin, ókpe derti sekildi áleýmetttik syrqattyń jaı-kúıin qarastyryp, talqylap, olardy zańdylyqpen sheshý joldaryn túsindirdik. Aıta keterimiz, úkimettik uıym tarapynan kórsetiletin osy qyzmettiń bári tegin túrde kórsetiledi. Maqsat – halyqpen birge jumys isteıtin jergilikti bılik pen quqyq qorǵaý organdary qyzmetkerleriniń osy memlekettik tegin qyzmet kórsetýlerdi únemi jurt jadyna salyp, kóbirek aıtyp túsindirý qajettigi. Álbette, olaı bolmaǵandyqtan, kóp rette ómirdiń qıyn jaǵdaıyna dýshar bolǵan turǵyndar ÚEU-den kómek surap jatady. Mundaıda jergilikti bılik pen quqyq qorǵaý organdarymen birlese kele, mańyzdy máseleni neǵurlym tıimdi sheshýge umtylamyz, – deıdi «Aqparattyq-resýrstyq ortalyq» QQ jetekshisi Altynaı Kóbeeva.