Olar ýaqytsha ustaý ızolátoryna qamaldy.
Medeý aýdandyq polısıa Basqarmasynyń qyzmetkerleri uzaq ýaqyt boıy tutynýshylyq maqsatta bankten onlaın nesıe rásimdegen 36 jáne 24 jastaǵy buryn sottalmaǵan azamattardy ustady, dep habarlaıdy Almaty-akshamy.kz.
«Alǵashqy tergeý áreketteri barysynda anyqtalǵandaı, kúdiktiler ótinishte kórsetilgen adamdarǵa aıtpastan jáne kelisiminsiz adamdardyń ótinishinde kórsetilgen jeke derekterdi, sondaı-aq olardyń sýretterin nemese beınefragmentin qoldana otyryp, banktiń saıtynda onlaın nesıe alýǵa ótinimderdi toltyrdy. Nesıelik ótinimder maquldanǵannan keıin jáne klıentterdiń shottaryna qarajat túskennen keıin, qarajatty ınternet-bankıng arqyly basqa bankterdiń shottaryna shyǵarǵan. Osylaısha, bankterdiń birine jalpy somasy 10 mıllıon teńgeden astam materıaldyq zalal keltirildi», - dedi Medeý aýdandyq polısıa Basqarmasynyń bastyǵy Dáýren Ótebaev.
Almaty qalalyq polısıa Departamenti Baspasóz qyzmeti málim etkendeı, polıseıler júrgizgen arnaıy sharalardyń arqasynda olar alaıaqtardy anyqtap, ustaýǵa qol jetkizdi. Qazirgi ýaqytta, tergeý aıaqtalǵansha, «alaıaqtardyń» ekeýi de ýaqytsha ustaý ızolátoryna qamaldy. Qylmystyq is Qylmystyq kodekstiń 190 baby 4 bóligi 2 tarmaǵy - «Aqparattyq júıeni paıdalanýshy aldaý nemese senimine qıanat jasaý arqyly jasalǵan alaıaqtyq» boıynsha tergelýde. Eger kúdiktilerdiń kinási dáleldense, olar 5 jyldan 10 jylǵa deıin bas bostandyǵynan aıyrylýy múmkin.