30 ákimshilik hattama toltyryldy.
Qaladaǵy polısıa saqshylary túngi kóliktegi buzaqylardy jazalady, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy málimet boıynsha, kólik júrgizýshilerdiń zańsyz áreketteri áleýmettik jelilerge júrgizilgen monıtorıń kezinde anyqtalǵan.
Avtokólik júrgizýshileriniń bir toby jol qozǵalysy erejelerin óreskel buzyp, jol qozǵalysynyń basqa qatysýshylarynyń ómiri men densaýlyǵyna qaýip tóndire otyryp, qalany aralap júrgen.
«Bul kólikterdiń júrgizýshileri anyqtaldy. Olardyń jasy 22-de. Tájirıbe kórsetkendeı, zańǵa baǵyný men kólik júrgizý tártibiniń deńgeıi óte tómen. Olarǵa qatysty zańnamaǵa sáıkes sharalar qoldanyldy. Barlyǵy bes júrgizýshige 30 ákimshilik hattama toltyryldy. Atap aıtqanda, manevr jasaý erejelerin buzǵany, jol belgileri men tańbalaý talaptaryn saqtamaǵany, baǵdarshamnyń qyzyl túsinde júrgeni, apattyq jaǵdaı týǵyzǵany, memlekettik tirkeý nómiri belgisiz kólik quralyn basqarǵany, artqy jaǵymen qozǵalǵany, jolaýshylardy tasymaldaý erejelerin buzǵany, kólik quralyna arnaıy dabyl beretin qurylǵylardy ornatqany, taǵy basqa quqyq buzýshylyqtary úshin», – dedi jergilikti polısıa qyzmeti basqarmasynyń bastyǵy Manap Sattarov.