Departament málimeti boıynsha, jyl basynan beri Almatyda 205 esirtki qylmysy anyqtaldy jáne esirtki satýǵa qatysty 35 derektiń joly kesildi.
Jyl basynan beri Almaty qalasynyń polıseıleri esirtkiniń iri partıasyn tárkiledi, onyń ishinde 7 kelisi - sıntetıkalyq esirtki. Bul týraly Óńirlik komýnıkasıalar qyzmetiniń alańynda Almaty qalasy PD-niń arnaıy ókili Saltanat Ázirbek málimdedi, dep habarlaıdy Almaty-akshamy.kz.
«Osylaısha, jalpy somasy 187,5 mln teńgeni quraıtyn 30 000 doza áleýetti tutynýshylarǵa jetpeı qaldy. Bul rette «sıntetıka» shyǵaratyn 3 esirtki zerthanasy joıyldy. Esirtki qoımasyn uıymdastyrýdyń 2 deregi jáne quramynda esirtkisi bar ósimdikterdi ósirýdiń 1 deregi anyqtaldy», - dedi S.Ázirbek.
Sondaı-aq, departamentte sıntetıkalyq esirtkini onlaın satý máselesine erekshe nazar aýdaryp otyr.
Jyl basynan beri polıseıler 27 esirtki betbelgisin qoıýshyny ustady, esirtki taratatyn jáne jarnamalanatyn 73 ınternet-resýrs anyqtaldy. Sońǵylary týraly aqparatty odan ári buǵattaý úshin «Kıbernadzorǵa» jiberildi.
«Narkostop» qozǵalysynyń eriktileriniń belsendi qatysýymen esirtkiniń taralýy týraly aqparatty qamtıtyn 1 myń 500 graffıtı jazýy tabyldy jáne boıaý arqyly joıyldy.
«Esirtki quraldaryn, psıhotroptyq zattardy nemese sol tektesterdi, prekýrsorlardy zańsyz jarnamalaǵany úshin QK-tiń 299-baby 1-1-bóligimen 1 adam jaýapkershilikke tartyldy», - deıdi spıker.
Almatyda jyl basynan beri 300-ge jýyq profılaktıkalyq is-shara júrgizildi. Narkolog-dárigerlermen birlese, aqparattyq jumys júrgizýge basa nazar aýdaryldy.
Osyǵan oraı, polısıa departamenti men Almaty qalasynyń bilim basqarmasy jalpy bilim beretin mektepter men kolejderde taqyryptyq dárister, trenıńter, semınarlar ótkizý memorandýmǵa qol qoıyldy.