Almatyda qabyrshaq muzdyń júrýi qaýpi saqtalady.
Qalalyq TJD málimetinshe, Almatyda aýa raıynyń ózgerýine baılanysty ózenderde seń júrýi múmkin (ózen, sý arnalary betindegi muzdyń kóterilip júrýi, zajor jáne t.b.).
Bul qubylys uzaq aıaz jáne aýa raıynyń birden jylýyna baılanysty seńniń, qabyrshaq muzdyń júrýine ákelýi múmkin (muzdy sel), dep habarlaıdy Almaty-akshamy.kz QazAqparatqa silteme jasap.
Osyǵan oraı «Qazseldenqorǵaý» MM jáne Almaty qalalyq TJD mamandary eskertý jasady.
«Taıaý kúnderi qabyrshaq muzdyń júrý qaýpi saqtalady. Almaty qalasynyń turǵyndary men qonaqtaryna (Qarǵaly, Aqsaı, Úlken jáne Kishi Almaty ) ózenderiniń sý arnalarynyń janynda serýendep júrmeý qajet. Balalardy qaraýsyz qaldyrmańyz, ózen arnasynyń jaıylmasynda, jaqyn jerde avtokólikterdi qoımańyz»,- dep eskertti vedomstvo ókilderi.
Eske salaıyq, ótken jyldyń jeltoqsan aıynda Almatyda aýa temperatýrasynyń aýytqýyna baılanysty muz kóship, Esentaı ózeniniń jaǵalaýyndaǵy qorshaýdy buzyp ketken bolatyn.