Aýrýhanaǵa medısınalyq kómek alý úshin 18 azamat júgingen.
Almaty oblysynyń polısıasy dámhanaǵa kelýshilerdiń jappaı ýlanýyn tekserip jatyr, dep habarlaıdy Almaty-akshamy.kz QazTAG-qa silteme jasap.
«30 qańtarda adamdardyń jappaı ýlaný faktisi boıynsha QR QK 304-baby (sanıtarlyq erejelerdi nemese gıgıenalyq normatıvterdi buzý) boıynsha qylmystyq is tirkeldi. Tekserý barysynda zardap shekkenderdiń «Besaǵash» kentinde ornalasqan kafelerdiń birinde tamaq ishkennen keıin densaýlyq jaǵdaıyna shaǵym túskeni anyqtaldy», - dep habarlady Almaty oblysy polısıa departamentiniń baspasóz qyzmetinen.
Quqyq qorǵaý organdarynyń qyzmetkerleriniń aıtýynsha, aýrýhanaǵa medısınalyq kómek alý úshin 18 azamat júgingen, olardyń arasynda jas balalar da bar.
«Atalǵan fakt boıynsha qajetti azyq-túlik tárkilenip, saraptama taǵaıyndaldy, onyń nátıjesi boıynsha túpkilikti prosesýaldyq sheshim qabyldanady», - dep tolyqtyrdy polısıa qyzmetkerleri.
Belgili bolǵandaı, zardap shekkenderdiń jaǵdaıy týraly shaǵymdar atalǵan kafeden doner kebabty jegennen keıin bastaldy.