Almaty oblystyq esirtki qylmysyna qarsy is-qımyl basqarmasynyń qyzmetkerleri óńirde saıajaı alaptarynyń tóraǵalarymen profılaktıkalyq áńgimeler júrgizdi, dep habarlaıdy Almaty-akshamy.kz Polisia.kz-ke silteme jasap.
«Ózderińiz biletindeı, esirtki zerthanalary kóbinese sharýa qojalyqtary, saıajaılar, qaraýsyz qalǵan fermalar, baý-baqsha seriktestikteri sıaqty shalǵaı aýmaqtarda ornalasady. Osyǵan baılanysty, polısıa qyzmetkerleri osy ýchaskelerde turaqty negizde pysyqtaý sharalaryn júzege asyrady. Saıajaı alaptarynda turatyn turǵyndarǵa saıajaı úılerin jalǵa alǵan kúdikti adamdar týraly saýalnama júrgizedi», – dedi PD esirtki qylmysyna qarsy is-qımyl basqarmasy bastyǵynyń m.a. Ardaq Qaısarov.
Saıajaı men baý-baqsha kooperatıvteriniń tóraǵalaryna ádette esirtki óndiretin oryndardan qandaı erekshe ıis shyǵatyny, sondaı-aq olardyń alańdaýshylyǵyn týdyrýy múmkin basqa faktorlar týraly aıtyldy. Óz kezeginde qatysýshylar kúdikti adamdardy nemese avtokólikterdi baıqaǵan jaǵdaıda quqyq qorǵaý organdaryna dereý habarlaýǵa ýáde berdi.
Esterińizge sala keteıik, aǵymdaǵy jyldyń 1 toqsanynda 5 esirtki zerthanasy anyqtaldy, onyń ishinde 3-i sıntetıkalyq esirtki quraldaryn daıyndaý boıynsha (İle aýdanynda) jáne 2-i quramynda esirtki zaty bar ósimdikterdi ósirý boıynsha (Eńbekshiqazaq jáne Talǵar aýdandarynda) anyqtaldy. Zańsyz aınalymnan 193 keliden astam túrli esirtki, onyń ishinde 120 keliden astam sıntetıkalyq esirtki tárkilenip, joıyldy.