Jer ýchaskesin satyp alarda aýmaqtyń qyzyl syzyqta turǵanyn eshkim eskertpegen
Almaty oblysynda turǵyn úı tóńireginde daý týdy. Osydan bir apta buryn Qarasaı aýdanynyń jer bólimi júzdegen baspananyń súriletini týraly habarlaǵan. Sebebi Kókózek aýylynyń irgesinen gaz qubyry ótedi, dep habarlaıdy Almaty-akshamy.kz Qazaqstan.tv-ge silteme jasap.
Talap boıynsha magıstraldiń eki jaǵynda 150 metrge deıin nysan bolmaýy tıis. Muny jaqynda ǵana estigen turǵyndarǵa tóbesinen jaı túskendeı áser etken. Janar Seıitqojaeva tórt jyldan beri bar tapqanyn baspanasyna salyp keledi. İshin tolyq bitirgenshe qyrýar qarjy ketkenin aıtady. Jer ýchaskesin satyp alarda aýmaqtyń qyzyl syzyqta turǵanyn eshkim eskertpedi deıdi.
«Aramyzda 137 úıdi salyp tastaǵandar jáne onyń 10 shaqtysynda ǵana zańdy qujat bar úılerinde. Basqamyzda qujat joq. Qanshama kredıt aldyq, kóp balaly otbasylar bar, múgedektigi anyqtalǵan otbasylar bar. Jáne jalǵyzbasty analar turady», - deıdi Kókózek aýylynyń turǵyny Janar Seıitqojaeva.
Aýyl halqynyń deni baspanasyn zańdastyryp úlgermegen. Ol azdaı byltyrdan beri úıdiń qujatyn rásimdeýge jer bólimi tarapynan shekteý qoıylǵan. Turǵyndar sebebin bilmeı dal. Jaqynda ǵana baspanalarynyń súriletini týraly habar kelgen.
«Myna jerde jazylǵan "memleket menshigine qaıtarylsyn" dep. Biz ol úıdi basyp alǵan joqpyz. Ol jerdi zańdy túrde satyp alyp otyrmyz. Memlekettik aktimen kelisimshartpen zańdy túrde. Gazdyń trýbasyn basqalaı júrgizýdi talap etemiz. Talabymyz - bizdiń qujatymyzdy jasap bersin», - dedi Kókózek aýylynyń turǵyny Gúlim Qusaıynqyzy.
Jınalǵan jurttyń talabyn tyńdaýǵa oblys, aýdan ákimdiginen adamdar keldi. Aıtýlarynsha, 2016 jyly óńir basshysynyń sheshimimen aýmaqta qurylysqa tyıym salý týraly qaýly shyqqan. Jer ýchaskeleriniń de qalaı zańdastyrylyp, satylyp ketkeni belgisiz.
«Ol jerde qurylys júrgizýge bolmaıdy. Bizde sýreti bar. 2016 jyly belgilegende, bul jerde bir úı de bolmaǵan. Bulardyń barlyǵy - 2016 jyldan keıin salynǵan úıler. Qazir sizderge eshkim bul úıdi zańdastyryp bermeıdi. Zańǵa qaıshy bolady», - deıdi oblystyq jer qatynastary basqarmasy basshysynyń mindetin atqarýshy Qaırat Qydyrbaev.
Qurylys júrgizýge shekteý bola tura, 40 shaqty úı qujattaryn alyp, zańdastyryp alǵan. Bul saýalǵa memlekettik qyzmetkerler bir-birine siltep naqty jaýap bermedi. Jer ýchaskelerin satý faktisi boıynsha Qarasaı aýdanynyń ákimdigi quzyrly organdarǵa shaǵymdanbaqshy. Al turǵyndar máselesi sheshiledi dep sendirdi.
Osylaısha taraptar ortaq sheshimge kele almady. Turǵyndar aldymen mańdaı aqy, taban termen salǵan baspanamyzdy zańdastyryp almaı, kelisimge kelmeımiz dep otyr. Máselege qashan núkte qoıylary ázirge belgisiz. Al jospar boıynsha gaz qubyryn tartý jumystary jazda bastalýy tıis.