Azyq-túlik taýarlarynyń baǵasyn turaqtandyrýǵa erekshe kóńil bólýi kerektigi aıtyldy.
Almaty oblysynyń basshylary óńirde 475 myń tonna azyq-túlik qory baryn aıtty, dep habarlaıdy Almaty-akshamy.kz.
Qazaqstan Premer-Mınıstri Álıhan Smaıylovtyń tóraǵalyǵymen ótken Úkimet otyrysynda elimizdiń 2022 jylǵy qańtar-aqpandaǵy áleýmettik-ekonomıkalyq damý jáne respýblıkalyq búdjettiń atqarylý qorytyndylary qaraldy.
«Jıynda Álıhan Smaıylov qazirgideı kúrdeli kezeńde ekonomıkanyń ósý qarqynyn saqtaı otyryp, ári qaraı jedeldetý asa mańyzdy mindet ekenin, ákimderdiń áleýmettik mańyzy bar azyq-túlik taýarlarynyń baǵasyn turaqtandyrýǵa erekshe kóńil bólýi kerektigin aıtty. Bul rette azyq-túlik qaýipsizdigin qamtamasyz etý sharalary týraly Almaty oblysynyń ákimi Qanat Bozymbaev baıandady. Onyń aıtýynsha, oblys ózin ózi azyq-túlik taýarlarynyń 9 túrimen, ıaǵnı sıyr men qoı eti, jumyrtqa, qant, maýsymaralyq kezeńde pıaz, kartop, sábiz, qyryqqabat, qyzanaqpen 100 paıyz, un, qıar, alma, qus eti, sútpen 90 paıyz qamtamasyz etip otyr. Sonymen birge sary maı, ósimdik maıy, irimshik pen súzbe, shoshqa etin óndirýdi ulǵaıtýǵa den qoıdy», - delingen Almaty oblysy ákiminiń baspasóz qyzmetiniń habarlamasynda.
Azyq-túlik qaýipsizdigin qamtamasyz etý maqsatynda bıyl aýyl sharýashylyǵy daqyldarynyń egis kólemi 1,3 myń gektarǵa ulǵaıtylyp, 974 myń gektarǵa jetkiziledi.
Jalpy quny 75 mlrd teńgeni quraıtyn 47 ınvestısıalyq joba iske asyrylady. Atap aıtqanda, ımport almastyrý mindeti aıasynda «Prıma Qus» kompanıasynyń jylyna 36 myń tonna et óndiretin qus fabrıkasy salynýda, ınvestısıa kólemi - 34 mlrd.teńge.
1 myń gektarǵa qarqyndy baq ósirýge 33 mlrd teńge ınvestısıa tartylady. Syıymdylyǵy 6 myń tonna jemis saqtaý qoımasy salyndy. Osy jyly 11,4 myń tonnalyq taǵy 4 osyndaı nysan iske qosylady. 34 mlrd teńgege jemis-jıdek klasteriniń ınfraqurylymy salynýda. Kókónisterdi jyl boıy óndirýge kóshý sharalarynyń nátıjesinde oblysta jylyjaı kókónisterin óndirý 35 myń tonnaǵa deıin jetkiziledi. İshki naryqty almamen qamtý úshin 400 gektarǵa jańa jemis baǵy otyrǵyzylady.
«Qaıta óńdeý kásiporyndaryn tolyq qýatynda paıdalaný úshin 15 bordaqylaý alańy men 3 taýarly sút fermasyn ashýdy josparlap otyrmyz. Bıyl 1,4 mln tonna astyq, 1 mıllıon tonnadan astam kókónis, 742 myń tonna kartop jınaý josparlanýda. Sondaı-aq, et óndirisi 3,9 %-ǵa, sút - 2,5%-ǵa, jumyrtqa óndirisi - 4,9 %-ǵa ulǵaıady», - dedi Qanat Bozymbaev.
Úkimet qabyldaǵan Inflásıa deńgeıin tómendetýdiń 2022-2024 jyldarǵa arnalǵan is-sharalar kesheni aıasynda áleýmettik mańyzy bar azyq-túlik baǵasyn ustap turýǵa 5,7 mlrd teńge bólindi, onyń 1,1 mlrd teńgesi – turaqtandyrý qoryna ónim satyp alýǵa, 4,6 mlrd teńgesi aınalymdyq sqema boıynsha turaqtandyrý qoryn qurýǵa baǵyttaldy.
Turaqtandyrý qoryna 10 myń tonna azyq-túlik satyp alynǵan, búgingi kúnge qalǵany - 1,3 tonna. Qosymsha 400 mln teńgege 830 tonna áleýmettik mańyzy bar ónimder satyp alý josparlanýda. Qazirgi ýaqytta 475 myń tonna azyq-túlik qory bar.
Aınalymdyq sqema boıynsha 4,1 mlrd. teńgege 21 shart jasaldy. Qazirgi ýaqytta 4,5 myń tonna ónim bar, forvardtyq satyp alý boıynsha 3,5 myń tonna kókónis jetkiziletin bolady. Qosymsha 1,4 mlrd. teńge jeńildetilgen qaryz berý josparlanýda, Túrkistan oblysynan erte pisetin kókónis jetkizýge sharttar jasalýda.
Jalpy oblysta ótken jyly aýyl sharýashylyǵy ónimderiniń kólemi bir trıllıon teńgeden asyp, 331 mlrd. teńgege azyq-túlik ónimderi shyǵaryldy.