Almaty men Qytaıdyń iri qalalary arasyndaǵy áýe qatynasyn keńeıtý, sondaı-aq týrısik jáne iskerlik baılanystardy nyǵaıtý máselesi Almaty ákimi Erbolat Dosaev pen Air China Limited áýe kompanıasynyń tóraǵasy, China National Aviation Holding Company prezıdenti Ma Chonsán myrzamen kezdesý barysynda talqylandy.
Bul is-shara Almaty ákimi Erbolat Dosaevtyń Qytaı Halyq Respýblıkasyna jasaǵan jumys sapary aıasynda Beıjińde ótti, dep habarlaıdy aqshamnews.kz.
Kezdesýdiń negizgi nátıjesi – Almaty ákimdigi men Qytaıdyń ulttyq áýe tasymaldaýshysy Air China arasyndaǵy reısterdi ashýǵa járdemdesý jónindegi memorandýmǵa qol qoıýy boldy.
Taraptar eki el arasyndaǵy ekonomıkalyq ósim men mádenı almasýdyń mańyzdylyǵyn atap, jolaýshylar legin arttyrý ári Qazaqstan men Qytaı týrıserine logıstıkany jeńildetý maqsatynda «Almaty-Beıjiń» qosymsha reısin jáne «Almaty-CHendý» jańa reısin iske qosý múmkindigin qarastyrdy.
«Qol qoıylǵan memorandým – Almatynyń halyqaralyq kólik baılanysyn damytýdaǵy mańyzdy qadam. Qytaı – Almaty týrızmin damytýdaǵy negizgi maqsatty naryqtyń biri. 2024 jyl Qytaıdaǵy Qazaqstan týrızmi jyly bolyp jarıalandy, al bıylǵy jyl – Qazaqstandaǵy Qytaı týrızmi jyly. Byltyr Almatyǵa Qytaıdan 95,3 myńnan astam týrıs keldi, bul 54%-ǵa ósim kórsetti. Jasalǵan kelisim aıasynda týrısik aǵynnyń qarqyndy damýy jalǵasady dep senemiz», – dedi Erbolat Dosaev.
«Tongcheng Travel Qytaı agenttiginiń «2025 jyldyń bolashaǵy eń zor jańa baǵyty» marapaty Almatynyń týrısik áleýetiniń moıyndalǵanyn jáne qytaılyq týrıserdiń aımaqqa degen qyzyǵýshylyǵynyń artqanyn kórsetedi. Jalpy, 2024 jyly Almatyǵa shamamen 2 mıllıon týrıs keldi, onyń ishinde 600 myńnan astamy sheteldik. 2025 jyly 2,3 mıllıon týrıs, onyń ishinde 700 myń sheteldik týrıs keledi dep kútilýde», – dedi Erbolat Dosaev.
Óz kezeginde China National Aviation Holding Company prezıdenti Ma Chonsán myrza kezdesýge alǵys bildirip, bolashaqtaǵy jemisti yntymaqtastyqqa nıetti ekenin jetkizdi. «Almaty – Qazaqstannyń mádenı, iskerlik jáne týrısik ortalyǵy, sondaı-aq Eýropa men Azıany baılanystyratyn mańyzdy býyn. Qazaqstannyń basty «áýe qaqpasy» retinde Almaty Ortalyq Azıa boıynsha saıahattardyń bastapqy núktesi bolyp tabylady», – dedi ol.
Almaty-Beıjiń baǵytyndaǵy qosymsha reıs pen «Almaty-CHendý» baǵytyndaǵy jańa reıs 2024 jyldyń maýsym aıynda iske qosylady dep josparlanyp otyr. Qazirgi ýaqytta QR Kólik mınıstrligimen birlesip daıyndyq jumystary júrgizilýde. Tıisti baǵyttar ushý quqyqtary bólingennen keıin ashylady.
«Almaty-Beıjiń» qosymsha reısi men «Almaty-CHendý» jańa reısin bıyl maýsym aıynda iske qosý josparlanýda. Qazirgi ýaqytta daıyndyq jumystary júrgizilip jatyr, tıisti baǵyttar ushý quqyqtary bólingennen keıin ashylady.
Aıta keteıik, Qazaqstannyń eń iri qalasy retinde Almaty kólik ınfraqurylymyn belsendi túrde jańǵyrtyp keledi. 2024 jyly jańa halyqaralyq áýejaı termınalynyń qurylysy aıaqtalyp, onyń ótkizý qabileti jylyna 14 mıllıon jolaýshyǵa deıin artty.
Anyqtama:
Air China – Qytaıdyń jetekshi áýe tasymaldaýshysy jáne Star Alliance ǵalamdyq avıasıalyq alánsynyń múshesi. Beıjińdegi áýe parkinde 952 áýe kemesi bar, onyń 535-i Air China kompanıasyna tıesili. Qazirgi ýaqytta Almatydan QHR-nyń myna qalalaryna tikeleı reıs ashylǵan: Beıjiń – aıyna 53 reıs (Air Astana – 22, China Southern Airlines – 31), Úrimji – aıyna 61 reıs (Air Astana – 17, China Southern Airlines – 44), Sıan – aıyna 9 reıs (China Southern Airlines), Hanchjoý – aıyna 18 reıs (Loong Air), Saná – aıyna 9 reıs (Air Astana).