Memleket basshysynyń tehnıkalyq jáne kásiptik bilim sapasyn arttyrý jáne jańa formattaǵy zamanaýı kadrlardy daıarlaý jónindegi tapsyrmalaryn júzege asyrý maqsatynda Almaty kópsalaly kolejiniń bazasynda «Ushqyshsyz ushý apparattary» quzyrettilik ortalyǵy óz jumysyn bastady, – dep habarlaıdy Aqshamnews.kz QR Oqý-aǵartý mınıstrliginiń baspasóz qyzmetine silteme jasap.
Qazaqstanda qazirgi eńbek naryǵynyń suranystaryna saı tehnıkalyq baǵyttaǵy sapaly mamandardy daıarlaýǵa erekshe nazar aýdarylýda. Jańa ortalyqtyń ashylýy ınovasıalyq tehnologıalar men ınjenerlik bilimniń toǵysynda jańa múmkindikter ashatyn mańyzdy qadam bolyp tabylady. Aldaǵy ýaqytta ortalyqta «Ushqyshsyz ushý apparattaryn paıdalaný jáne baǵdarlamalaý» jańa oqý baǵdarlamasy engiziledi. Baǵdarlama stýdentterge drondardy jobalaý, qurastyrý, basqarý jáne tehnıkalyq qyzmet kórsetý salasynda kásibı quzyrettilikterdi meńgerýge múmkindik beredi.
Joba aıasynda kolejdiń áleýmettik seriktesteri retinde Halyqaralyq bilim berý jáne ınovasıalar ortalyǵy men Qytaıdyń Zhongke Borui Education Technology Research Institute uıymdary qoldaý kórsetýde.
«Bul joba tehnıkalyq jáne kásiptik bilim berý júıesin zamanaýı talaptarǵa saı damytýǵa baǵyttalǵan jáne eldiń ınovasıalyq áleýetin arttyrýǵa úles qosatyn bilim men ınovasıa salasyndaǵy halyqaralyq tıimdi yntymaqtastyqtyń aıqyn úlgisi. Ushqyshsyz ushý apparattary salasyndaǵy bilim berý baǵdarlamalaryn jetildirý arqyly Qazaqstan básekege qabiletti kadrlar daıarlaýǵa múmkindik alady», – deıdi QR Oqý-aǵartý mınıstrliginiń Tehnıkalyq jáne kásiptik bilim departamentiniń dırektory Áset Muhanbetov.
Quzyrettilik ortalyǵy ınovasıalyq bilim berý tehnologıalaryn engizý, stýdentterdiń robototehnıka, aerotúsirilim, 3D-kartografıa jáne ınfraqurylymdy monıtorıń salasyndaǵy praktıkalyq daǵdylaryn damytý, sondaı-aq pedagogterdi drondardy oqytý prosesinde tıimdi qoldanýǵa daıarlaý baǵyttary boıynsha jumys júrgizedi. Sonymen qatar munda halyqaralyq trenıńter, sheberlik sabaqtary men ushqyshsyz ushý apparattary boıynsha jarystar uıymdastyrylyp, sheteldik bilim berý jáne tehnologıalyq uıymdarmen seriktestik baılanystar keńeıtiledi.