A.Chehov atyndaǵy Ortalyq qalalyq kitaphanada Qazaqstannnyń Halyq artısi, QR Memlekettik syılyǵynyń, «Qurmet» jáne «Otan» ordenderiniń ıegeri, ánshi, kompozıtor Eskendir Hasanǵalıevtiń týǵanyna 85 jyl tolýyna oraı «Atameken» atty eske alý keshi ótti.
"Ákem Eskendir Hasanǵalıevtiń 85 jyldyq mereıtoıy elimiz boıynsha jer-jerde ótip jatyr. Onyń ishinde osyndaı oqyrmandarmen kezdesýler, konsertter, baıqaýlar bar. Mine, bir apta buryn ǵana Batys Qazaqstan oblysynan taǵy bir rýhanı-mádenı kezdesýden keldik. Onda «Atameken» atty úlken festıvál ótti. On úshinshi márte uıymdastyrylyp otyr. Áleýmettaný ǵylymynda «organıka» degen termın bar. Iaǵnı, mysaly, óner adamy ómirden ketse de, onyń sońynda qalǵan dúnıeleri, shyǵarmalary umytylmaı, jalǵasyn taýyp, atymen birge jasaı beredi. Demek ákemniń jazǵan ánderi máńgilik, halyq júreginen oryn alǵan týyndylar. Halyqtyń osynaý qurmetine sheksiz rızamyn", – dedi sazger-ánshiniń uly, kompozıtor, QR eńbek sińirgen qaıratkeri Birjan Hasanǵalıev.
Keshtiń maqsaty – qazaqtyń uly ónerpazy Eskendir Hasanǵalıevtiń shyǵarmashylyǵyn, onyń mýzykalyq murasyn nasıhattaý, sondaı-aq qazaq án ónerine qosqan úlesin eske alý. Iá, bul mádenı, rýhanı is-shara onyń óneriniń mańyzdylyǵyn jastarǵa jetkizýge baǵyttalǵan.
Oqyrman zalyna Eskendir Hasanǵalıevtiń jubaıy Darıko apaı kirip kelgende jınalyp kútip otyrǵan jastar ushyp turyp, ánshi-sazgerdiń zaıyby aqyryn aıańdap tórge ozǵansha uzaq qol soǵyp kútip turdy. Keıingi býynnyń qoshametine rıza bolǵan Darıko Hasanǵalıeva kópshilikke asqan iltıpatpen basyn ızeı berdi. Kóńiliniń tolqyǵany baıqaldy. Úıinen bir dorba tátti ala kelgen eken, qazaqtyń jolymen shashý shashty.
"Men Torǵaı oblysynda qyzmette júrgen kezim. 1972 jyly bizge Eskendir Hasanǵalıev keldi. Ol kezde oblystyq partıa komıtetiniń hatshysy Ózbekáli Jánibekov edi. Oblys endi qurylyp jatqan kezeń. Jóndi qonaq úıimiz joq degendeı. Sonda Eskendir Hasanǵalıev Óz-aǵamyzdyń tapsyrmasymen meniń shańyraǵymda qonaq boldy. Kolhoz, sovhozdardy aralady, uıadaı ǵana klýbtarda halyqqa konsert berdi. Kóptiń yqylasy erekshe bolatyn. Qazir ǵana uly Birjan jazǵan kitaptan oqyp qaldym, eki júz alpys toǵyz án jazypty. Áli esimde, kúnde keshke Almatyǵa, Darıkoǵa telefon soǵatyn, amandyǵyn bilip jatatyn. Aınymas daǵdysy edi. Netken qurmet, súıispenshilik dep tańǵalatynbyz. Eskendirdiń ánderiniń bári rıasyz mahabbattan, meıirim, patrıottyq sezimnen týǵandyqtan ómirsheń", – deıdi Almaly aýdany Ardagerler keńesi tóraǵasynyń orynbasary Serik Ahmetov.
Óner adamymen keshken ǵumyrynan estelikter aıtty. Kitaphana tórinen uly, kompozıtor, QR Eńbek sińirgen qaıratkeri Birjan Hasanǵalıev pen nemeresi hám óner jolyna qadam basqan kishkentaı Nursultan da oryn aldy.
Kesh meımandary – Mıras pen Quralaı Bekjanovtar mereıtoı ıesiniń «Ádemi-aý», «Eskirmegen mahabbat» ánderin áýelete shyrqady. Birjan Hasanǵalıev uly sazger-ánshiniń shyǵarmalarynan popýrrı oryndap berdi. «Alataý» dástúrli óner teatrynyń ánshileri – Maǵjan Satybaldy men Ulsaıa Bektas ta Eskendir Hasanǵalıevtiń tanymal týyndylaryn dombyra jáne baıannyń súıemeldeýimen usyndy. Janaryna jas tunǵan Darıko apaı barlyq ánge qosylyp otyrdy.
"Eskendir aǵa men Darıko apaıdy jas kúnimizde teledıdardan tamashalap otyratynbyz. Netken ádemi jandar deýshi edik súısinip. Keıin bir sahanada án salamyz dep kim oılaǵan?! Darıko apaıdyń qoıý shaıyn talaı ishkenbiz. Bul kisiler bizdiń shańyraqta da talaı márte qonaq bolǵan. Eskendir aǵa birden «Mıras, pıanınoń qaıda?» dep suraıtyn. Sóıtip úıimizdi áp-sátte án-jyrǵa bólep kep jiberetin. Ákem baıan tartatyn, anam án salatyn. Sonda ekeýi Eskendir Hasanǵalıevtiń ánderin oryndaıtyn. Bala kúnimizden janymyzǵa jaqyn sol týyndylardy tyńdap óskenimizben, keıin biz de oryndaımyz dep oılamadyq. Qazir Eskendir aǵanyń «Eskirmegen mahabbat», «Ádemi-aý», «Jas jubaılar» ánderin halyq jıi suraıdy. Sondyqtan Quralaı ekeýmizdiń repertýarymyzdan eshqashan túsken emes. Eskendir aǵany qatty jaqsy kórdik biz. Óte qarapaıym, aqkóńil kisi edi. Ázilderi de keremet edi. Ómirsheń týyndylary máńgilik jasaı beretinine senemin", – dedi ánshi, QR eńbek sińirgen qaıratkeri Mıras Bekjanov.
Kesh sońynda Birjan Hasanǵalıev Chehov kitaphanasyna ákesiniń ómiri men shyǵarmashylyǵy týraly jazǵan kitabyn tartý etti. Al kitaphana jetekshisi Tolqyn Quramysova eń kishkentaı meıman – Nursultan Birjanulyna ertegi kitaptar syılady. Árıne, sosyn keshti Eskendir Hasanǵalıevtiń úlken-kishi birge qosylyp shyrqaǵan áıgili «Atameken» áni túıindedi.