Jyldyń eń kóp kútken mýzykalyq keshteriniń birine sanaýly mınýttar qaldy — Almatydaǵy Ortalyq stadıonda Djennıfer Lopestiń álemdik týry Up All Night aıasyndaǵy grandıozdy konserti bastalmaq.
Búgin kún boıy munda kórermender men stadıonnyń jaı-kúıine erekshe kóńil bólindi. «Almaty Tazalyq» qyzmeti aýmaqty únemi aralap, qoqysty jyldam jınap, qoqys jáshikterin bosatyp, ár buryshtyń taza ári uqypty bolýyn qadaǵalady. Olardyń úılesimdi jumysy men eriktilerdiń qoldaýynyń arqasynda aýmaq jaıly ári merekelik kúıinde saqtalyp, qonaqtardyń sátti tamashalaýyna eshteńe kedergi keltirmedi.
Uıymdastyrýshylar bul sharalar respýblıkalyq «Taza Qazaqstan» ekologıalyq aksıasynyń bir bóligi ekenin atap ótti. Aksıa maqsaty — konsertke jaıly jaǵdaı jasaý ǵana emes, qalany aıalaýdyń mańyzdylyǵyn eske salý. Búgin Almaty álemdik sýperjuldyzdy bar sulýlyǵymen, tazalyǵymen jáne qonaqjaılyǵymen qarsy alyp otyr.