Qytaı Halyq Respýblıkasyna jasaǵan jumys sapary barysynda Almaty ákimi Darhan Satybaldy Shanhaıda ótip jatqan halyqaralyq ımporttyq kórmege (China International Import Expo, CIIE) bardy, dep habarlaıdy aqshamnews.kz
Bul is-shara jyl saıyn álemniń jetekshi kompanıalaryn biriktiretin jáne saýdany, ınvestısıany ári tehnologıalyq yntymaqtastyqty damytýǵa yqpal etetin asa iri halyqaralyq alańdardyń biri sanalady.
Qala basshysy almatylyq pavılonnyń jumysymen tanysty. Munda megapolıstiń eksporttyq jáne ınvestısıalyq áleýetin tanystyrǵan 12 kompanıa ónimderi men jobalaryn usyndy. Almatylyq kásiporyndar ınovasıa, tehnologıa, týrızm, tamaq ónerkásibi jáne kreatıvti ındýstrıa baǵytyndaǵy jobalaryn kórsetti.
Darhan Satybaldy Qazaqstan men Qytaı arasyndaǵy ekonomıkalyq yntymaqtastyqty nyǵaıtýǵa, sondaı-aq Almatynyń ınvestısıa men joǵary tehnologıa ortalyǵy retindegi brendin ilgeriletýge bul kórmeniń mańyzy zor ekenin atap ótti.
«Almaty — Qazaqstannyń eń iri ekonomıkalyq ortalyǵy ǵana emes, sonymen qatar halyqaralyq iskerlik baılanystyń mańyzdy alańy. CIIE sıaqty sharalar qalanyń áleýetin tanystyrýǵa jáne ártúrli elderden kelgen seriktestermen tikeleı baılanys ornatýǵa múmkindik beredi», — dedi ákim.
China International Import Expo — Qytaı Úkimetiniń halyqaralyq saýda men ınvestısıany yntalandyrýǵa baǵyttalǵan basty bastamalarynyń biri. Kórme jańa tehnologıalyq sheshimderdi usynýǵa, tájirıbe almasýǵa jáne iskerlik kelisimder jasaýǵa arnalǵan ámbebap platforma retinde qyzmet etedi.
Almaty men qazaqstandyq kompanıalardyń CIIE alańyna qatysýy Qytaı aımaqtarymen jáne ınvestorlarymen yntymaqtastyqty nyǵaıtýǵa, sondaı-aq eki el arasyndaǵy mádenı-ekonomıkalyq baılanysty damytýǵa yqpal etedi.