Almaty ákimi Darhan Satybaldy «Almaty Tazalyq» komýnaldyq kásipornyna baryp, qalanyń aldaǵy qysqy maýsymǵa daıyndyǵymen tanysty.
Qala kóshelerin ýaqytyly tazalaý men jol qozǵalysynyń qaýipsizdigin qamtamasyz etý maqsatynda Almatyda arnaıy tehnıka parki jańartylyp jatyr. «Almaty Tazalyq» kásipornynyń qaramaǵynda 700-den astam tehnıka bar. Bıyldyń ózinde 36 jańa tehnıka satyp alynyp, jyl sońyna deıin taǵy 294 zamanaýı mashına ákelinbek. Olardyń ishinde kópfýnksıaly jol tazalaý kólikteri, JetBroom júıeleri men shnek-rotorlar bar. Bul qala joldaryn qys boıy taza ári qaýipsiz ustaýǵa sep bolmaq.
Kásiporynda 2 myńnan astam adam eńbek etedi. Aýa raıy nasharlaǵan jaǵdaıda qosymsha 3 myńǵa jýyq ýaqytsha qyzmetker jumyldyrylmaq. Qys maýsymyna arnalǵan 605 tehnıka ázir tur, 45 myń tonna kóktaıǵaqqa qarsy materıal qory daıyndalǵan, qosalqy bólshekter qoımalary da tolyq jasaqtalǵan.
Bıyl Áýezov aýdanynda káriz sýynyń jylýyn paıdalanyp jumys isteıtin alǵashqy qar eritetin pýnkt iske qosyldy. Onyń qýaty táýligine 1200 tekshe metrge deıin jetedi. Jyl sońyna deıin Bostandyq aýdanynda gazben jumys isteıtin Trecan-80SG-M qondyrǵysy negizinde taǵy bir zamanaýı qar eritkish keshen paıdalanýǵa berilmek. Ol táýligine 4 myń tekshe metrge deıin qardy eritip, súzgiden ótken sýdy qalanyń káriz júıesine jiberedi.
«Qyzmetke kelgen bette-aq Almatynyń segiz aýdanynyń barlyǵyn araladym. Sol kezde árbir mekeme tehnıkasyn, qyzmetkerlerin tanystyryp, tolǵaqty máselelerin aıtqan edi. Búginde sol túıtkilderdiń basym bóligi sheshimin tapty. Qala qysqa daıyn, endi bári sizderdiń uıymdasqan jumystaryńyzǵa, jaýapkershilikterińizge jáne eńbekterińizdiń sapasyna baılanysty», – dedi Darhan Satybaldy.
Ákim komýnaldyq tehnıkany jańartý, jańa tehnologıa engizý jáne qar eritetin nysandardyń sanyn kóbeıtý isin júıeli túrde jalǵastyrýdy tapsyrdy. Sondaı-aq, ekologıaǵa zıansyz kópkomponentti kóktaıǵaqqa qarsy materıaldardy synaqtan ótkizý jóninde tapsyrma berildi.
Darhan Satybaldy merdiger uıymdardyń qysqy maýsymǵa tolyq daıyn bolýyn, qala kósheleri men joldyń kútim sapasyn arttyrýdy jáne komýnaldyq qyzmetterdiń jumysyn turaqty baqylaýda ustaýdy mindettedi.