Ákim ardagerlerdi merekemen quttyqtaıtynyn aıtty.
Almaty ákimi Erbolat Dosaev Uly Jeńistiń 77 jyldyǵy men ardagerler qozǵalysynyń 35 jyldyǵyn merekeleý qarsańynda Almaty qalalyq ardagerler keńesiniń saltanatty plenýmyna qatysty, dep habarlaıdy Almaty-akshamy.kz.
Kezdesýde Uly Otan soǵysynyń ardagerleri, eńbek ardagerleri, ınternasıonalıs-jaýyngerler, aýǵan soǵysyna qatysýshylar, qoǵamdyq uıymdardyń ókilderi jáne t.b. boldy.
Óziniń sózinde Erbolat Dosaev Jeńis kúniniń bizdiń halqymyz úshin erekshe tarıhı mańyzy bar ekenin atap ótti. Soǵys jyldary maıdanǵa 1,3 mln qazaqstandyq shaqyryldy. Qazaqstannyń 100 myńnan astam jaýyngeri jaýyngerlik ordendermen jáne medaldarmen marapattaldy, al 500-den astam adam Keńes Odaǵynyń Batyry ataǵyn ıelendi. Almaty ákimi qalada Uly Otan soǵysynyń árbir ardagerin merekemen quttyqtaıtynyn atap ótti.
«Ózim jáne meniń orynbasarlarym, aýdan ákimderi jáne máslıhat depýtattary Uly Jeńis kúni qarsańynda árbir ardager men soǵys ardagerin jeke kelip, quttyqtaıtyn bolamyz. 28 gvardıashyl-panfılovshylar atyndaǵy saıabaqtaǵy merekelik is-sharalarǵa qatysyp, Máńgilik alaý janynda batyrlardy eske alýǵa nıet bildirgen ardagerler úshin arnaıy transfert uıymdastyrylady», - dedi Erbolat Dosaev.
Aǵymdaǵy jyly qala máslıhaty Almaty ákiminiń UOS qatysýshylary men múgedekterine tólemderdi eki ese – 500 myńnan 1 mıllıon teńgege deıin ulǵaıtý jónindegi usynysyn qoldady. Olarǵa teńestirilgen tulǵalar 100 myń teńgeden alady, soǵysqa qatysýshylardyń otbasylary men jesirlerine, tyl eńbekkerlerine 50 myń teńgeden tólenedi. Barlyǵy 15 myńnan astam adam memlekettiń qarjylyq qoldaýyna ıe bolady, osy maqsattarǵa búdjette 1,1 mlrd teńge qarastyrylǵan.
Erbolat Dosaev qart adamdardyń bos ýaqytyn uıymdastyrý jáne olarǵa qoldaý kórsetý jónindegi keshendi sharalar týraly da aıtyp berdi. Qalada 200 myńnan astam adamǵa tegin áleýmettik qyzmet kórsetetin toǵyz belsendi uzaq ómir súrý ortalyǵy jumys isteıdi. Kelesi jyly taǵy bir belsendi uzaq ómir súrý ortalyǵyn ashý josparlanýda.
Kezdesý barysynda qalalyq ardagerler keńesiniń tóraǵasy Aqan Bıjanov Almaty qalasynda ardagerler qozǵalysynyń belsendi damyǵanyn aıtty. Qazirgi kezde Panfılov dıvızıasy, áskerı-áýe kúshteri, ÁSHQQ áskerleri ardagerleriniń, Lenıngrad blokadalary men fashızm tutqyndarynyń Keńesteri jumys isteıdi. Ardagerler uıymdarynyń músheleri jaýyngerlerdiń jerlengen jerlerdi kútip baptaıdy, túrli patrıottyq aksıalar ótkizedi jáne jas urpaqty tárbıeleýge, onyń ishinde «Shyńǵa órleý» jobasy aıasynda úles qosýda. Joba az qamtylǵan otbasy balalarynyń tálimgerligine aǵa býyn ókilderin keńinen tartýda.
Pleným barysynda Almaty qalalyq jáne Almaly aýdandyq ardagerler keńesiniń múshesi Hamıt Birjanov, Uly Otan soǵysynyń ardageri, QR UǴA akademıgi, fılosofıa ǵylymdarynyń doktory Dosmuhammed Qishibekov, Sosıalısik Eńbek Eri Vera Sıdorova, QR eńbek sińirgen qaıratkeri Nurlan Orazalın, Bostandyq aýdandyq ardagerler keńesiniń tóraǵasy Asen Bespaeva sóz sóıledi. Qatysýshylar ardagerler uıymdarynyń qoǵamdyq qyzmeti týraly áńgimeledi, qalany damytý boıynsha usynystaryn aıtty, sondaı-aq ótken jyldardaǵy jyly estelikterimen bólisti.
