Almaty ákimi Erbolat Dosaevtyń qala turǵyndarymen kezekti kezdesýi Naýryzbaı aýdanynda ótti. Qala basshysy aýdannyń damýy jáne ótken jyly turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 350-den astam adam keldi, dep habarlaıdy Almaty-akshamy.kz.
Qarqyndy damyp kele jatqan Naýryzbaı aýdany úshin jol jáne áleýmettik ınfraqurylymdy, ınjenerlik komýnıkasıalardy, birinshi kezekte sýmen jabdyqtaýdy, kárizdi jáne elektr jelilerin damytý máseleleri barynsha ózekti bolyp tabylady.
Ótken jyly aýdanda shamamen 85 shaqyrym sýmen jabdyqtaý jáne káriz jelileri salyndy. Aǵymdaǵy jyly turǵyndardy sapaly jáne sýmen turaqty qamtamasyz etý boıynsha jumystar jalǵasady: 19,9 shaqyrym jeli salynýda, 335 shaqyrym jeliniń qurylysyn jobalaý josparlanýda. "Aqjar" jáne "Qaraǵaıly" shaǵynaýdandary boıynsha JSQ memlekettik saraptamaǵa jiberildi. Qarǵaly ózeninde sý qoımasynyń qurylysy aıaqtalyp, Aqsaı ózeninde sý qoımasynyń qurylysy jalǵasady. Nátıjesinde, 2025 jyldyń sońyna deıin Naýryzbaı aýdanyn sapaly sýmen turaqty qamtamasyz etý máselesi sheshiletin bolady.
Aýdan turǵyndaryn turaqty elektrmen qamtamasyz etý úshin elektr jelilerin jańǵyrtý jalǵasýda. Osylaısha, 2022 jyly 79 transformatorlyq qosalqy stansıa jóndelip, 3,8 km elektr jelileri rekonstrýksıalandy. Aǵymdaǵy jyly taǵy 35 transformatorlyq qosalqy stansıa men 84 km elektr jelilerin, onyń ishinde "Aqjar", "Qalqaman-2", "Qaraǵaıly", "Quramys" jáne "Taýsamaly" shaǵynaýdandaryndaǵy jelilerdi jóndeý josparlanǵan.
Aýdannyń jol-kólik ınfraqurylymyn damytý máselesi ózekti bolyp qalýda. 2022 jyly 4 jańa baǵyt ashylyp, qoldanystaǵy 4 qoǵamdyq kólik baǵyty uzartyldy. 13 baǵyttaǵy jyljymaly sostav (173 avtobýs) jańartyldy, 12 aıaldama kesheni jabdyqtaldy. 10 shaqyrym jol jáne 8 km jaıaý júrginshiler trotýarlary salyndy, 23 shaqyrym jol jabynyna ortasha jóndeý júrgizildi.
Aǵymdaǵy jyly "Aqjar" jáne "Shuǵyla" shaǵynaýdandaryndaǵy 20 kóshe boıynsha 16,4 km jol salynady. 21 shaqyrym jolǵa ortasha jóndeý júrgizildi. Avtobýs parkin jańartý, aıaldama keshenderin salý jalǵasady.
Jyl sońyna deıin Abaı dańǵylyn qala shekarasyna deıin uzartýdy aıaqtaý josparlanýda. Sondaı-aq, Jubanov kóshesin Momyshuly kóshesinen qala shekarasyna deıin uzartý jobasy boıynsha memlekettik saraptama qorytyndysy kútilýde.
Naýryzbaı aýdanyndaǵy basty másele – oqýshy oryndarynyń tapshylyǵyn tómendetý. Ótken jyly "Qalqaman" men "Shuǵyla" shaǵynaýdandarynda 5100 oryndyq 4 mektep ashyldy. Aýdanda turǵyn úı salý qarqynyn eskere otyryp, taǵy 6 mektepti jobalaý jáne salý jumystary júrgizilýde.
Medısınalyq qyzmet kórsetýdiń qadamdyq qoljetimdiligin qamtamasyz etý jáne aýdanda emhanalar tapshylyǵy problemasyn sheshý úshin "Quramys" jáne "Shuǵyla" shaǵynaýdandarynda 500 adam qabyldaıtyn 2 jańa emhana, 1 dárigerlik ambýlatorıa salý josparlanýda.
Syrtqy jaryqtandyrý boıynsha úlken jumys júrgizilýde. 2022 jyly aýdannyń 10 ýchaskesinde jumystar oryndaldy. Aqpan aıynyń sońyna deıin taǵy bir ýchaskede – Kenesary kóshesinde jumystar aıaqtalady.
Turǵyndardyń kóptegen ótinishterine baılanysty aýdannyń baý-baqsha seriktestikterinde ornalasqan 50 kóshede (34 km) syrtqy jaryqtandyrýdy qosymsha júrgizý josparlanýda. Jumystardy «Halyq qatysatyn búdjet» baǵdarlamasy aıasynda júrgizý josparlanýda.
Ótken jyly qala ákiminiń tapsyrmasy boıynsha aýdan úshin «Halyq qatysatyn búdjet» baǵdarlamasyna lımıtter 500 mln teńgege ulǵaıtyldy. Osy baǵdarlama aıasynda 2022 jyly 1,8 mlrd. teńge somasyna 47 joba iske asyryldy. Qoǵamdyq keńistikterdiń 21 ýchaskesi jáne jol ınfraqurylymy boıynsha 26 joba abattandyryldy. Aǵymdaǵy jyly osyndaı somaǵa 46 jobany iske asyrý josparlanýda.
Almaty ákimimen kezdesý barysynda aýdan turǵyndary joldardy jóndeý, káriz jáne elektr jelilerin jańǵyrtý, t.b. máselelerdi kóterdi.