Almaty ákimi qaladaǵy jol tóseminiń jýyrdaǵy shógýi men jekelegen ýchaskelerde jıektastyń negizsiz aýystyrylýy máselesin baqylaýda ustap otyr. Darhan Satybaldy Áýezov aýdanyndaǵy Amanjol jáne Iassaýı kóshelerindegi asfálttyń shógýi, Ermensaı shaǵynaýdanynda transheıalardyń shaıylýy, sondaı-aq Bostandyq aýdanyndaǵy Úlken Almaty ózeniniń jaǵalaýynan granıt plıtalardyń urlanýy derekteri boıynsha qyzmettik tergeý júrgizýdi tapsyrdy.
Jekelegen aýmaqtarda merdiger uıymdardyń jumysyn tıisinshe baqylamaý saldarynan oryn alǵan jaǵdaıǵa baılanysty: nóser kezinde Amanjol kóshesinde jol tósemi shógip (sýmen jabdyqtaý jáne káriz jelilerin tartý boıynsha qurylys-montaj jumystaryn «Spesstroı Grýpp LTD» JSHS oryndaǵan), 13 avtokólik zaqymdaldy. Sondaı-aq Iassaýı kóshesinde asfált opyrylǵan (uzyndyǵy 2,8 km bolatyn káriz jelisin «Speskommýnstroı» merdiger uıymy salǵan). Osyǵan baılanysty Áýezov aýdany ákimine qatań sógis jarıalandy.
Budan bólek, Ermensaı shaǵynaýdanynda ınjenerlik komýnıkasıalar tartý úshin qazylǵan transheıalardy qatty sý aǵyny shaıyp, avtokólikterdiń qozǵalysyna kedergi keltirgen ýchaskede («SGGroup Sapa Stroı» JSHS jumysy), sondaı-aq ál-Farabı dańǵyly men Jarokov kóshesindegi jerasty ótkelinde granıt plıtalardy negizsiz aýystyrý jumystaryna baqylaýdyń bolmaýyna baılanysty Bostandyq aýdany ákiminiń bolmaýyna oraı onyń turǵyn úı-kommýnaldyq sharýashylyǵy jáne abattandyrý salasyna jetekshilik etetin orynbasary qyzmetinen bosatyldy.
Merdiger uıymdy baqylaýda kemshilik jibergeni úshin – Medeý aýdany ákimine de qatań sógis jarıalandy. Ýálıhanov býlvaryndaǵy jıektasty zańsyz sheship alyp, plıtalardy oblystaǵy jeke úıge jetkizý oqıǵasy qoǵamda úlken narazylyq týǵyzdy. Atalǵan derek boıynsha qylmystyq is qozǵaldy.
Sonymen qatar, qala basshysy Úlken Almaty ózeniniń arnasyn qaıta jańǵyrtý jáne irgeles aýmaqty abattandyrý jobasyn oryndap jatqan «Pavlodar ózen porty» AQ merdiger uıymynyń jumysyndaǵy kemshilikterge qyzmettik tekseris júrgizýdi jáne onyń sebebin anyqtaýdy tapsyrdy. Osyǵan baılanysty jobanyń tapsyrys berýshisi – Ekologıa basqarmasynyń basshysyna sógis jarıalandy. Ákim sondaı-aq Polısıa departamenti bastyǵyna Úlken Almaty jaǵalaýynan granıt plıtalardyń urlanýyna qatysty qylmystyq is tergeýiniń nátıjeleri boıynsha esep berýdi tapsyrdy.
Budan bólek, Darhan Satybaldy qysqa merzimde jobalardaǵy anyqtalǵan kemshilikterdi joıýdy tapsyrdy. Sondaı-aq, Memlekettik sáýlet-qurylys baqylaý basqarmasyna merdiger uıymdardyń jáne tehnıkalyq qadaǵalaý qyzmetiniń jumysyn qaıta tekserý mindetteldi. Eger bul merdiger uıymdardyń jumystaryn adal oryndamaǵany rastalsa, qatań shara qoldanyp, aıyppul salynatyn bolady.