21 qyrkúıek kúni saǵat 10:00-den 21:00-ge deıin Tuńǵysh Prezıdent saıabaǵy dástúr boıynsha molshylyq pen ulttyq dástúrler merekesine aınalady, dep habarlaıdy aqshamnews.kz
Qala kúnine oraı munda aýqymdy Alma Fest 2025 festıvali ótedi. Qonaqtar úshin alma jármeńkesi, etnoaımaq, qolóner jármeńkesi, gastronomıalyq alań, balmuzdaq festıvali, ashyq aspan astyndaǵy kınoteatr jáne basqa da qyzyqty is-sharalar uıymdastyrylady.
Festıváldiń basty nyshany – 100 tonna alma. Jármeńkede kólemi men erekshe hosh ıisimen áıgili ańyzǵa aınalǵan almatylyq aporttan bastap, sırek kezdesetin koleksıalyq sorttarǵa deıin usynylady. Mundaı dám Almatynyń naǵyz «almanyń astanasy» degen mártebesin aıshyqtaı túsedi.
İs-shara aıasynda aty ańyzǵa aınalǵan «Dos-Muqasan» ansambli, ánshi Karına Abdýllına, Astra jáne Royals Band óner kórsetedi. Festıváldiń basty hedlaıneri – TURAR. Konsert Almatyǵa degen shynaıy súıispenshilikti bildirip, merekeni emosıaǵa toly sımfonıaǵa aınaldyrady.
Almatylyqtar men qala qonaqtaryn baı mádenı baǵdarlama kútip tur. Balalarǵa arnalǵan batýttar, oıyndar, shatyrly sırk pen sheberlik dáristeri ótip, tabıǵı ónimder men qolóner taǵamdary usynylatyn avtorlyq jármeńke uıymdastyrylady. Teatr qoıylymdary men etno-sheberlik saǵattary ulttyq dástúrmen tanystyrsa, ekoaımaq zamanaýı ekologıalyq bastamalardy kórsetedi. Jańa tehnologıany baǵalaıtyndar úshin VR-aımaq, al belsendi turǵyndar úshin ashyq aspan astyndaǵy sporttyq saıystar qarastyrylǵan.
Alma Fest – mádenı mura men zamanaýı megapolıs yrǵaǵyn toǵystyryp, otbasylyq demalys pen shabyt alańyna aınalatyn erekshe mereke.