QR Premer-Mınıstri Álıhan Smaıylov Qyrǵyz Respýblıkasynyń Tótenshe jáne Ókiletti elshisi Dastan Dúshekeevpen kezdesý ótkizdi. Kelissóz barysynda taraptar saýda jáne ınvestısıalar, tranzıt jáne kólik, sondaı-aq sý-energetıkalyq teńgerim salalaryndaǵy yntymaqtastyq máselelerin talqylady, dep habarlaıdy Almaty-akshamy.kz.
Álıhan Smaıylov baýyrlas eki el arasyndaǵy 30 jyldyq dıplomatıalyq qarym-qatynas kezinde saıası, saýda-ekonomıkalyq jáne mádenı-gýmanıtarlyq salalarda ózara túsinistik qalyptasqanyn atap ótti. Ózara saýda máselesin talqylaı otyryp, QR Premer-Mınıstri taýar nomenklatýrasyn keńeıtý qajettigi týraly pikir bildirdi.
Saýda-ekonomıka salasyndaǵy negizgi jetistik ózara saýda kóleminiń ulǵaıýy jáne belgilengen $1 mlrd-qa qol jetkizý boldy. Jańa mindet — taýar aınalymynyń kólemin $2 mlrd-qa jetkizý.
«Bizde saýdany ulǵaıtý áleýeti bar 190 taýar pozısıasy boıynsha usynys bar. Bizge Qarasý-Aqtilek ótkizý beketi mańynda ındýstrıalyq saýda-logıstıkalyq keshender qurý jobasyn iske asyrýdy jedeldetý qajet», — dedi Á. Smaıylov.
Sý-energetıka salasyndaǵy ózara is-qımylǵa qatysty QR Mınıstrler kabınetiniń basshysy bul saladaǵy máseleler júıeli túrde sheshilip jatqanyn atap ótti. D. Dúshekeev óz kezeginde Qyrǵyzstan tarapynyń Qazaqstannan tikeleı ınvestısıalar tartýǵa múddeli ekenin jetkizdi.
«Biz ınvestısıalyq jáne saýda saıasatyn jetildirý jolynda belsendi jumys júrgizip jatyrmyz. Bıznes júrgizý jáne kásipkerler men ınvestorlardyń quqyqtaryn qorǵaý úshin qolaıly jaǵdaılar jasalyp jatyr», — dedi Qyrǵyzstannyń Qazaqstandaǵy Tótenshe jáne Ókiletti elshisi.
Sondaı-aq D.Dúshekeev ortaq múddelerdi qanaǵattandyrý aıasynda azyq-túlik qaýipsizdigin qamtamasyz etýge qatysty usynys aıtty.
Mundaı sheshimniń maqsaty – syrtqy naryqtardaǵy turaqsyzdyq jaǵdaıynda azyq-túlik qaýipsizdiginiń buzylýynyń syn-tegeýrinderin tómendetý úshin birikken saıasatty ázirleý. Kezdesý qorytyndysy boıynsha taraptar barlyq qozǵalǵan másele boıynsha ymyraǵa kelýge daıyn ekendikterin bildirdi.