QR Premer-Mınıstri Álıhan Smaıylov pen Eýropalyq komısıanyń vıse-prezıdenti Maros Shefchovıch Qazaqstan men Eýropalyq Odaq arasyndaǵy saýda, ınvestısıa, energetıka, kólik jáne logıstıka salalaryndaǵy yntymaqtastyqty nyǵaıtý máselelerin talqylady.
Premer-Mınıstr Qazaqstan Eýropalyq Odaqpen ınvestısıalyq seriktestikti odan ári tereńdetýge jáne ózara saýdany ártaraptandyrýǵa múddeli ekenin atap ótti. Sonymen qatar sońǵy jyldary asa mańyzdy shıkizat salasyndaǵy yntymaqtastyqty damytý máselesi de ózekti bolyp otyr.
Álıhan Smaıylov byltyr COP-27 konferensıasy aıasynda Eýrokomıssıa basshysy Ýrsýla fon der Láıenmen birge osy baǵyttaǵy yntymaqtastyq týraly memorandýmǵa qol qoıylǵanyn eske saldy. Al birneshe apta buryn Almatyda Eýropalyq komısıanyń vıse-prezıdenti Valdıs Dombrovskıspen osy Memorandýmdy júzege asyrý boıynsha jol kartalarymen almasý sharasy ótti.
«Qujat ekonomıkanyń naqty sektorlaryndaǵy áriptestigimizdi nyǵaıtý boıynsha naqty sharalardy kózdeıdi, onyń negizgi elementi «jasyl» tehnologıalardy engizý bolyp tabylady. Bul osy saladaǵy ortaq maqsattarymyzdy júzege asyrýǵa qosymsha serpin beretini sózsiz», — dedi Premer-Mınıstr.
Óz kezeginde Marosh Shefchovıch Eýropalyq Odaqtyń buǵan deıin qol jetkizilgen barlyq ýaǵdalastyqty júzege asyrýdy jalǵastyrýǵa daıyn ekenin atap ótti.
«Meniń respýblıkaǵa saparym Eýropalyq Odaqta Qazaqstandy asa mańyzdy strategıalyq seriktes retinde kóretinimizdi dáleldeıdi. Biz ózara taýar aınalymynyń artqanyna qýanyshtymyz jáne sizdiń eldegi eń iri ınvestorlardyń biri bolǵanymyzdy maqtanysh tutamyz. Meniń saparymda sizderdiń mınıstrlerińizben kezdesýlerdiń barlyǵy sátti ótti. Biz birlese jumys isteýge bolatyn ortaq jobalardy talqyladyq. Barynsha tyǵyz yntymaqtastyqty ári qaraı nyǵaıtý – bizdiń kún tártibimizde turǵan negizgi máselelerdiń biri», — dedi Marosh Shefchovıch.