Elordanyń Esil aýdanynda ornalasqan eki qabatty dámhanalardyń birinde órt shyqty. Tótenshe jaǵdaılar mınıstrligi mamandarynyń jedel áreketiniń arqasynda tilsiz jaý ǵımaratqa tolyq jaıylmaı, der kezinde aýyzdyqtaldy, dep habarlaıdy Aqshamnews.kz tilshisi.
Aldyn ala málimetke sáıkes, órt týraly habarlama demalys kúni kezekshi bólimge túsken. Oqıǵa Elýbaı Taıbekov kóshesi boıyndaǵy qoǵamdyq tamaqtaný ornynda bolǵan. Qutqarýshylar jetken sátte ǵımaratty qoıý tútin basyp, ot birinshi jáne ekinshi qabattaǵy jıhazdardy sharpyǵan. Órttiń jalpy aýmaǵy 80 sharshy metrdi quraǵan.
Órt sóndirý bólimsheleriniń úılesimdi jumysynyń nátıjesinde jalynnyń nysannyń basqa bólikterine taralýyna jol berilmedi. Qaza tapqandar men jaraqat alǵandar joq, ǵımarattyń negizgi qurylymdary aman qalǵan. Qazir órttiń shyǵý sebepteri men materıaldyq shyǵyn kólemi anyqtalyp jatyr.