Taldyqorǵan stansıasy mańyndaǵy jekemenshik kirme jolda bes sısterna ózdiginen qozǵalyp, sonyń saldarynan Taldyqorǵan – Qarabulaq baǵytyndaǵy temirjol qatynasy ýaqytsha toqtatyldy, dep habarlaıdy Aqshamnews.kz tilshisi.
Oqıǵa 31 qańtarda saǵat 21:36-da Bars Build kompanıasyna tıesili kirme joldyń №215 qosý jolynda bolǵan. Júk tıelgen bes sısterna kútpegen jerden ornynan qozǵalyp ketip, olardyń ekeýi №214 saqtandyrý jolyndaǵy tuıyq tireýge soǵylǵannan keıin relsten shyqqan. Zardap shekkender joq, sondaı-aq sısternadaǵy suıyqtyqtyń tógilýi nemese aǵýy tirkelmegen.
Apat saldaryn joıý úshin oqıǵa ornyna 25 maman jáne 7 tehnıka jumyldyrylǵan. 1 aqpan saǵat 00:25-ten bastap Taldyqorǵan – Qarabulaq aralyǵy qozǵalysqa jabylyp, saldarynan №3604 poıyzy jolda kidirgen.
Qazaqstan temir joly oqıǵa kompanıanyń jaýapkershilik aımaǵyna kirmeıtin jekemenshik jolda bolǵanyn atap ótti. Qazir arnaıy komısıa qurylyp, vagondardyń ózdiginen qozǵalý sebepteri anyqtalyp jatyr.