Óskemende fastfýdtan jeti adam ýlanyp aýrýhanaǵa tústi
SHQO Sanıtarıalyq-epıdemıologıalyq baqylaý departamenti baspasóz qyzmetiniń málimetine súıensek, Óskemende stafılokokk ınfeksıasy bar shaýrmany jegen 7 adam ýlanyp, aýrýhanaǵa túsken. Olar shaýrmany qala kósheleriniń birinde turǵan pavılonnan satyp alǵan.
«Departamentke bir táýlik ishinde birdeı belgilermen aýrýhanaǵa túskender týraly jeti jedel habarlama jetti. Barlyǵy jıi qusyp, dene qyzýy kóterilip, úlken dáretke kóp bardy. Klınıkalyq derekter negizinde dárigerler barlyq naýqasqa «tamaqtan ýlaný» dıagnozyn qoıdy», - delingen aqparatta.
5 adam aýrýhanaǵa jatqyzylsa, ekeýi ambýlatorlyq em qabyldady. Qazirge ýaqytta pasıentter tolyqtaı jazylyp shyqqan.
«Júrgizilgen epıdemıologıalyq tekserý barysynda anyqtalǵandaı, barlyq ýlaný jaǵdaıy Óskemendegi fastfýd nysanynan satyp alynǵan shaýrmadan bolǵan. Sol pavılon ónimderin tekserý nátıjesinde shaýrma synamasynan «S.aureus 2*103 KOE/g» anyqtaldy. Bul stafılokokk ınfeksıasy. Ónimde stafılokokktyń qaıdan paıda bolǵany belgisiz. Pavılon qyzmetkerlerinen atalǵan ınfeksıa tabylmady», - deıdi departament basshysy Ǵalymbek Alın.
Degenmen fastfýd nysany jumysynan basqa buzýshylyqtar tirkeldi. Atap aıtqanda, ónimderdi tasymaldaý sharttary saqtalmaǵan, tamaq ónimderiniń qaýipsizdigin rastaıtyn ilespe qujattar bolmaǵan, pavılon ishinde jándikter júrgen. Dezınseksıalaý jáne deratızasıalaý jumystary júrgizilgenin rastaıtyn qujat ta joq bolyp shyqty. Kásip ıesi atalǵan buzýshylyqtarǵa joıýǵa mindetteldi. Tek sodan keıin ǵana nysan jumysyn jalǵastyra alady.