Batys Qazaqstan oblysynda aýa raıynyń qolaısyzdyǵyna baılanysty respýblıkalyq mańyzy bar eki tasjol ýchaskesinde barlyq kólik túri úshin qozǵalys ýaqytsha shekteldi, dep habarlaıdy Aqshamnews.kz tilshisi.
Qaı baǵyttar jabyldy:
-
Kaztalovka – Jánibek – RF shekarasy: Kaztalovka aýylynan Jánibek aýylyna deıingi 0–158 km aralyǵy saǵat 11:00-den bastap jabyq.
-
Ónege – Bısen – Saıqyn: Ónege aýylynan Saıqyn aýylyna deıingi 0–103 km ýchaskesi saǵat 12:00-den bastap jabyldy.
Joldardy qaıta ashýdyń boljamdy ýaqyty — 1 aqpan, 18:00. Degenmen merzim aýa raıyna qaraı ózgerýi múmkin.
Mańǵystaýdaǵy ahýal: buǵan deıin «Dossor – Qulsary – Beıneý – Shetpe – Jetibaı – Aqtaý» tasjolynyń Shetpe men Jetibaı aralyǵyndaǵy 632–718 km bóligi jabylǵan. Atalǵan ýchaskeni 1 aqpan saǵat 11:00-de qaıta ashý josparlanǵan.
Jolǵa shyǵar aldynda: joldyń ashyq-jabyqtyǵyn naqtylaý úshin táýlik boıy jumys isteıtin 1403 baılanys ortalyǵyna habarlasyp nemese Sapar qosymshasy arqyly tekserýge bolady.