Blogerler Erbolat Janabylov pen Elmıra Tólegenovaǵa baılanysty tergeý aıasynda qosymsha, aýyr qylmystyq baptar tirkelgen, dep habarlaıdy Aqshamnews.kz.
Bul týraly blogerler otbasynyń advokaty Jasulan Rahymǵalıev málimdedi. Onyń aıtýynsha, erli-zaıyptylardyń áreketi Qylmystyq kodekstiń 214-babynyń 2-bóligi jáne 218-babynyń 2-bóligi boıynsha saralanyp otyr. Advokattyń málimetinshe, ásirese 218-bap, qylmystyq jolmen alynǵan aqsha men múlikti zańdastyrý deregi boıynsha qozǵalǵan is asa aýyr sanatqa jatady jáne ol 7 jylǵa deıin bas bostandyǵynan aıyrý jazasyn kózdeıdi.
Onyń aıtýynsha, tergeý organdary áleýmettik jeliler arqyly jınalǵan qarajatty zańsyz kásipkerlik nátıjesinde alynǵan kiris dep baǵalap, ony «zańdastyrý» belgilerin anyqtaǵan. Sonymen qatar, is materıaldarynda prokýror tarapynan memleket múddesine qatysty talap-aryz tirkelgen. Onda azamattardan jınalǵan qarajatty memleket kirisi retinde óndirip alý máselesi kóterilip otyr.
Qazirgi ýaqytta blogerlerge qatysty bultartpaý sharasy qaralýda. Rahymǵalıevtiń aıtýynsha, ázirge naqty qandaı shara qoldanylatyny belgisiz.
Aıta keteıik, buǵan deıin, 15 qyrkúıekte Astananyń mamandandyrylǵan aýdanaralyq soty Erbolat Janabylov pen Elmıra Tólegenovany lısenzıasyz lotereıa uıymdastyrǵany úshin ákimshilik jaýapkershilikke tartqan. Tergeý derekterine sáıkes, olar áleýmettik jelilerde aqsha, avtokólik jáne ózge de baǵaly syılyqtar tigilgen utys oıyndaryn turaqty túrde ótkizgen.
Sot sheshiminen keıin istiń materıaldary Qarjylyq monıtorıń agenttigine joldanyp, qarjy operasıalaryna qatysty qosymsha tekseris bastalǵan.