«Áleýmettik qorǵaý júıesiniń úzdik qyzmetkeri jáne úzdik áleýmettik joba» atty respýblıkalyq baıqaýdyń óńirlik kezeńi aıaqtaldy. Eldiń barlyq óńirlerinen baıqaýǵa jeti nomınasıa boıynsha 1041 ótinim kelip tústi.
Saraptaý nátıjesinde respýblıkalyq kezeńge 129 fınalıst ótti, - dep habarlaıdy Aqshamnews.kz.
QR Eńbek jáne halyqty áleýmettik qorǵaý mınıstrligi bastamashy bolǵan bul konkýrs áleýmettik sala mamandarynyń belsendiligin jáne ınovasıalyq bastamalaryn anyqtap, kótermeleýdi, sondaı-aq olardyń kásibı bedelin arttyrýdy maqsat etedi.
Áleýmettik qyzmetker mamandyǵy – qoǵamdaǵy eń izgi ári mańyzy zor mamandyqtardyń biri. Bul sala mamandary kún saıyn ómirdiń qıyn jaǵdaıyna tap bolǵan jandarǵa kómek kórsetedi: jalǵyzbasty qarttar men múgedektigi bar adamdarǵa úıde qyzmet kórsetedi, otbasylarǵa qoldaý bildiredi, arnaıy áleýmettik qyzmetter kórsetetin ortalyqtarda jumys isteıdi, eldiń ál-aýqaty úshin baǵa jetpes úles qosady. Elimizde jarıalanǵan Eńbek adamy jyly aıasynda bul konkýrs áleýmettik qyzmetkerlerdiń qoǵamdaǵy eńbeginiń mańyzdylyǵyn aıqyndap, olardyń janqıarlyq qyzmetine qoǵam nazaryn aýdarýdy kózdeıdi.
Respýblıkalyq kezeńge jeti nomınasıa boıynsha fınalıster irikteldi. Eń kóp qatysýshy usynylǵan nomınasıa – «Arnaýly áleýmettik qyzmetter kórsetý ortalyǵynyń úzdik áleýmettik qyzmetkeri» nomınasıasy boıynsha 20 úmitker irikteldi. Al «Úzdik áleýmettik joba», «Úzdik áleýmettik pedagog», «Eńbek mobıldiligi ortalyqtarynyń úzdik qyzmetkeri» jáne «Úıde kútim kórsetý uıymynyń úzdik áleýmettik qyzmetkeri» nomınasıalarynyń árqaısysynan 19 fınalıst shyqty. «Úzdik memlekettik áleýmettik ınspektor» nomınasıasy boıynsha 17 maman, al «Úzdik medısınalyq-áleýmettik saraptama qyzmetkeri» nomınasıasy boıynsha 16 maman baq synaıdy.
Baıqaýǵa elimizdiń barlyq óńirleri belsendi qatysty. İrikteý qorytyndysy boıynsha 13 óńirdiń (Astana, Almaty qalalary, Abaı, Aqmola, Almaty, Atyraý, Shyǵys Qazaqstan, Batys Qazaqstan, Qaraǵandy, Qyzylorda, Pavlodar, Soltústik Qazaqstan, Túrkistan oblystary) ókilderi barlyq jeti nomınasıada usynyldy.
Kelesi kezeńde depýtattyq korpýs ókilderi, qoǵam qaıratkerleri men áleýmettik sala sarapshylarynan quralǵan respýblıkalyq komısıa 20 qazanǵa deıin jeńimpazdardy anyqtaıdy.
Jeńimpazdardy marapattaý rásimi 24 qazanda, Áleýmettik qamsyzdandyrý qyzmetkerleri kúni qarsańynda Astana qalasynda ótedi.