Álemdik doda 19 naýryzǵa deıin jalǵasady
Erteń álemniń úzdik sportshylary Almatyda bas qosady. Megapolıste frıstaıldyń mogýl jáne shańǵymen akrobatıka túrinen álem chempıonaty bastalady, dep habarlaıdy Almaty-akshamy.kz Almaty.tv-ge silteme jasap.
Halyqaralyq dodaǵa 14 memleketten 80-nen astam sportshy qatysady. Olardyń qatarynda Aýstralıa, Germanıa, Kanada, Qytaı, AQSH pen Japonıa ókilderi bar. Bıyl sporttyń mogýl túrinen el namysyn Aıaýlym Ámirenova, Anton Bondarev pen Pavel Kolmakov qorǵasa, shańǵy akrobatıkasynan Janbota Aldabergenova jáne Aıana Joldas shyǵady.
«Bıylǵy jyldyń ereksheligi sportshylar Shymbulaqtaǵy jańadan salynǵan qarly trassalar men kúrdeli jóndeýden ótken jarys arenasynda baq synaıdy. Demalys aımaǵynda dodaǵa daıyndyq 3 aı buryn bastalǵan edi. Qar tazalaý tehnıkalary birneshe aýysymmen jumys isteıdi. Álemdik jarysqa qazir tolyq daıynbyz», – dedi QR Ulttyq shańǵy asosıasıasynyń bas hatshysy Asqar Valıev.
Búgin Almatyǵa sheteldik sportshylardyń sońǵy legi kelip jatyr. Erteń bastalatyn álemdik doda 19 naýryzǵa deıin jalǵasady. Aıta keteıik, jarys 1980 jyldan beri halyqaralyq shańǵy federasıasynyń qoldaýymen túrli memlekette ótkizilip keledi. Chempıonat sońǵy 5 jyl boıyna Almatydaǵy Shymbulaqta uıymdastyrylyp júr. Elimizdegi taý shańǵy kýrorty halyqaralyq talaptarǵa tolyq saı keledi.
«Halyqaralyq shańǵy jarysynyń bıyl taǵy da Almatyda ótkiziletinine qýanyshtymyz. Biz az ýaqyttyń ishinde Qazaqstannyń uıymdastyrý komıtetimen jaqsy qarym-qatynas ornattyq. Álem kýbogyn ótkizý úshin bizge osy eldiń Sport jáne mádenıet mınıstrligi de úlken qoldaý kórsetip otyr. Rızashylyǵymdy bildirgim keledi», – dedi Halyqaralyq FIS federasıasynyń dırektory Andrea Rınaldı.