2026 jyly Qazaqstanda taý-ken isi men ınjenerıa salasyndaǵy bedeldi joǵary oqý orny – Colorado School of Mines ýnıversıtetiniń álemdegi alǵashqy fılıaly ashylady.
Bul týraly Ǵylym jáne joǵary bilim mınıstrligi málimdedi, dep habarlaıdy aqshamnews.kz.
QS WUR pándik reıtıńinde «Mıneraldy jáne taý-ken ınjenerıasy» baǵyty boıynsha álemde birinshi oryndy ıelenetin bul ýnıversıtettiń Qazaqstanda ashylatyn fılıaly Ortalyq Azıadaǵy akademıalyq habtyń qarqyndy damýynyń jarqyn kórinisi bolmaq.
Sheteldik aldyńǵy qatarly joǵary oqý oryndaryn Qazaqstanǵa tartý boıynsha júrgizilgen jumys sapary aıasynda Qazaqstan Respýblıkasynyń Ǵylym jáne joǵary bilim mınıstrligi men Colorado School of Mines ýnıversıteti arasynda atalǵan oqý ornynyń fılıalyn Qazaqstanda ashý týraly kelisimge qol qoıyldy.
Qol qoıý rásimine Qazaqstan Respýblıkasynyń Ǵylym jáne joǵary bilim mınıstri Saıasat Nurbek, Colorado School of Mines ýnıversıtetiniń jahandyq bastamalar jónindegi vıse-prezıdenti Djon Bredford jáne Qazaqstan Respýblıkasy Prezıdentiniń kómekshisi Qanat Sharlapaev qatysty.
Fılıal Qazaqstannyń geologıa salasynyń júregi sanalatyn Jezqazǵan qalasynda, qurylyp jatqan Ulytaý tehnıkalyq ýnıversıtetiniń bazasynda ashylady. Bul ýnıversıtet taý-ken-metallýrgıa salasy úshin joǵary bilikti mamandar daıarlaıtyn bolady. Ulytaý tehnıkalyq ýnıversıtetiniń aýmaǵy 20 gektardy quraıdy, oqytý tolyǵymen aǵylshyn tilinde júrgiziledi jáne bakalavrıattyń 4 negizgi mamandyǵy boıynsha júzege asyrylady:
Taý-ken isi;
Geologıa jáne barlaý;
Geofızıkalyq ınjenerıa;
Munaı ınjenerıasy.
Aıta ketý kerek, bul Kolorado taý-ken mektebiniń sheteldegi alǵashqy kampýsy bolmaq. Fılıaldyń dál Qazaqstanda ashylýy elimizdiń senimdi bilim berý seriktesi retindegi jáne ınvestısıalar men tehnologıa transferin tartý salasyndaǵy basym aımaq retindegi mańyzyn kórsetedi.
Colorado School of Mines – 1873 jyly negizi qalanǵan memlekettik ýnıversıtet. Bul oqý orny stýdentterdi tek zertteýshilik qabiletke ǵana emes, naqty salalyq mindettermen jumys isteýge úıretýmen tanymal. Olar oqý barysynda halyqaralyq ınjenerlik jobalarǵa qatysý arqyly tájirıbe jınaqtaı alady.
Buǵan deıin Colorado School of Mines ýnıversıteti Satbayev University-men geologıa, munaı-gaz ınjenerıasy jáne taý-ken isi baǵyttary boıynsha 3+1+1 formatynda qos dıplom baǵdarlamasyn iske qosý jáne osy salalarda birlesken ǵylymı zertteýlerdi damytý týraly kelisimge kelgen bolatyn.
Jezqazǵan qalasynda tolyqqandy kampýstyń ashylýy óńirge jastar aǵynyn arttyryp, jańa jumys oryndarynyń qurylýyna jáne óńirlik ári jahandyq eńbek naryǵyna arnalǵan álemdik deńgeıdegi kadrlardy daıarlaýǵa múmkindik beredi.