Baǵdat Mýsın almatylyqtarmen kezdesti.
Sıfrlyq damý, ınovasıalar jáne aeroǵarysh ónerkásibi mınıstrligi aldaǵy 5 jylda qalanyń 75%-yn 5G jelisimen qamtýdy kózdep otyr. Búginde 5G bazalyq stansasy shahardyń 5 jerinde ornatylǵan. Sondaı-aq mınıstrlik memlekettik qyzmetterdi proaktıvti formatqa kóshirýdi myqtap qolǵa alǵan. Búgin vedomstvo basshysy Baǵdat Mýsın almatylyqtarmen kezdesip, jurttyń saýalyn tyńdady, dep habarlaıdy Almaty-akshamy.kz Almaty.tv cilteme jasap.
Almaty halqymen kezdesken Baǵdat Mýsın sıfrlandyrý salasynda atqarylyp jatqan jumystardy baıandady. Sózinshe, memlekettik qyzmetterdiń 94%-y elektrondy formatqa aýysqan. Birneshe platformada 20 túrli sıfrly qujat alýǵa bolady. Endi elimiz proaktıvti jumys baǵytyna kóshýi tıis. Iaǵnı budan bylaı azamat memlekettik qyzmetterdi alý úshin ár jerge baryp, taban tozdyrmaıdy, kerisinshe sıfrlyq qyzmetter adamǵa baǵyttalady.
"Osyndaı formatqa 26 proaktıvti qyzmetti engizip jatyrmyz. Bizdiń basty maqsatymyz - kelesi 7 jyldyqqa sıfrlyq memlekettik qyzmetterdi 90% avtomattandyrý emes, 90% proaktıvti formatqa kóshirý", - dedi mınıstr.
Bıyl qalanyń halyqqa qyzmet kórsetý ortalyqtary 2 mlnnan astam qyzmet kórsetken. Eger proaktıvti formatqa kóshý sátti júrse, 7 jyldan keıin jurt halyqqa qyzmet kórsetý ortalyqtaryna kelip áýre bolmaıdy. Sondaı-aq vedomstvo basshysy bıyl quqyq qorǵaý organdarymen jumys isteýge arnalǵan «E-Ótinish» platformasyn iske qosqan.
Mınıstrdiń aıtýynsha, onda azamattar smartfon arqyly aryz berip, sottyń sheshimine qatysty óz talabyn jibere alady. Sol sıaqty komýnaldyq turǵyn úı baǵyty da ońtaılandyrylady. Máselen, páter satylǵan kezde onyń komýnaldyq tólemderin jańa ıesine aýystyrýdy tezdetetin tıimdi tásil qarastyrylyp jatyr.
"Notarıýs qol qoıǵan kezde sizdiń qujatqa biz sol aqparatty sizdiń kelisimińizdi alyp, sodan keıin barlyq kvıtansıalardy berýshi, ıaǵnı komýnaldy qyzmetshilerge jiberemiz. Olar sony avtomatty túrde aýystyratyn bolady", - dedi Baǵdat Mýsın.
"Osylaısha myń san qyzmetti baryp, alý kerek dep bas qatyrmaıtyn bolamyz" degen Baǵdat Mýsın óz baıandamasynan keıin jıylǵan jurttyń suraǵyna jaýap berdi.
"Bizdiń elde, shyny kerek, 4G-diń ózine qol jetkizý qıyndaý. Sondyqtan 5G týraly sóz qylý qanshalyqty durys? Bul jeliniń quny da qymbat bolatyny anyq. Sondyqtan bul Qazaqstanǵa kerek pe? Óıtkeni baılanys operatorlary 4G úshin kún saıyn baǵalaryn ósirip jatyr", - dep saýalyn joldady qala turǵyny.
"Biz ǵalamdyq tendensıalardan artta qalmaýymyz kerek. 5G ǵalamtordaǵy eń ozyq qyzmetterdi usynýǵa múmkindik ashady. Álemde onyń kómegimen mashınalar júrgizýshisiz jumys istep jatyr. Operatorlar arasynda kúshti básekeni týdyrý úshin baılanys ınfraqurylymyn jaqsartyp otyrýymyz kerek. Báseke bolǵan kezde ǵana sapa men baǵa da retteledi", - dep jaýap berdi mınıstr.
Endi biri úılerge gaz kirgizý jumysyn halyqqa qyzmet kórsetý ortalyǵyna júkteýdi surady. Óıtkeni kógildir otyndy tartý merzimi jarty jylǵa deıin sozylyp ketedi.
"3 aıdan 6 aıǵa deıin gaz kirgize almaı otyrmyz. Sony HQKO-ǵa júkteseńizder, óte jaqsy bolar edi", - dedi ol.
"Osy nárseni biz jaqsartsaq, HQKO-ǵa kirgizsek, Almatyǵa kelgenimiz beker bolǵan joq desek bolady. «QazTransGaz Aımaqpen» kelisip, osyny jarty jylda jasap tastaıyq. «QazTransGaz Aımaqtyń» jańa jetekshisi qarsy bolmaıdy dep oılaımyn. Olarmen memorandýmǵa qol qoıyp, ol sol kompanıanyń qyzmeti bolsa da HQKO-ǵa kirgizý kerek", - dep sózin aıaqtady Mýsın.
Aıta keteıik, Prezıdent «Ortalyq atqarýshy organdardyń basshylaryn halyqpen kezdesý ótkizýge» mindettegen. Baǵdat Mýsın sol jarlyqtyń aıasynda Almatydan bólek, elimizdiń 4 óńirine barǵan bolatyn.