Kópti alań qylǵan ota sátti ótken.
Almatyda alǵash ret jasandy júrek ımplantasıasy jasaldy, dep habarlaıdy Almaty-akshamy.kz Almaty.tv cilteme jasap.
60 jastaǵy Ǵappar Qalıevti 2 jyldan beri júrek fýnksıasynyń jetkiliksizdigi mazalaǵan. «İsiný men aýyrý janymdy qınaıtyn» degen naýqas 38 kúnnen beri aýrýhanada. Júregi qan aıdaýda jetkiliksiz qyzmet atqarǵandyqtan, o basta azamattyń jaǵdaıy aýyr dep baǵalanypty. Abyroı bolǵanda, kópti alań qylǵan ota sátti ótken.
«Aýrý toqtamady, keıinnen 1-2 aıdan qaıtalana berdi. Basym aýyrady, túnde uıyqtamaımyn, aıaqtarymda, qaryndarymda isik bolady. 24 saǵat uıyqtamaǵan kúnderim kóp boldy. Mart aıynan bastap qatty aýyrdym. Ózime sendim, qoryqqan joqpyn», – dedi naýqas Ǵappar Qalıev.
Jańa ádis arqyl júrek qannyń búkil aǵzada aınalýyna kómektesedi. Iaǵnı, tútiktiń bireýi qolqaǵa, ekinshisi júrektiń sol jaq qarynshasyna qosylady. Al mundaı jasandy júregi bar naýqastyń tamyr soǵysy bolmaıdy, bul – basty erekshelik.
«Eger adamnyń sol jaq júrekshesi istemese, sol kezde nasos qoıyp, biz kómek jasaımyz adamnyń jaǵdaıyn jaqsartý úshin. Bul ota bizdiń óńirde birinshi ret jasalyp jatyr. Biraq mundaı naýqastar óte kóp. Kóp ota jasalýy kerek», – dedi Kardıohırýrgıa bólimshesiniń meńgerýshisi Rústem Tóleýtaev.
Júrek ımplantasıasy Almatyda birinshi ret jasaldy. Kómekshi mehanıkalyq qurylǵyny ornatýǵa Astanadaǵy Ulttyq kardıohırýrgıalyq ǵylymı ortalyqtyń mamandary da jumyldyrylǵan. Al almatylyq kardıohırýrgtar júrek patologıasyn emdeýdiń tyń ádisterin áli de engizetinin hetkizdi.
«Bizdiń mamandar otandyq, sheteldik klınıkalarda tájirıbe jınaqtady. Jalpy, bul otaǵa bizdiń ujym óte uzaq daıyndaldy. Sátti ótken júrek ımplantasıasy – bizdiń 3 jyldyq eńbegimizdiń nátıjesi», – dedi Kardıologıa jáne ishki aýrýlar ǴZI basqarma tóraıymy Roza Qýanyshbekova.
Júrek ımplantasıasyn kútip jatqan taǵy 1 naýqas bar. Ol ázirge jansaqtaý bóliminde. Azamattyń jaǵdaıy otaǵa qaýqarly dep tanylǵanda kezekti ımplantasıa qoıylatyn bolady.