Qazaqstan Ulttyq bankiniń tóraǵasy Tımýr Súleımenov Alataý jańa megapolısi Almaty qalasyna qarsy tartylys ortalyǵy (kontrmagnıt) bolatynyna senimdi,dep habarlaıdy aqshamnews.kz
Onyń aıtýynsha, bul — jańa qalany qurýdaǵy basty maqsattardyń biri. Iaǵnı, eldegi eń iri megapolıs Almatynyń júktemesin azaıtý bolmaq.
Súleımenovtiń aıtýynsha, Alataýda Qazaqstan úshin buryn-sońdy bolmaǵan erekshe sharalar qolǵa alynady.
Bul — jańa býyn qalasy bolady, onda bári jańasha qurylmaq. Ol Almatyǵa qarsy tartylys ortalyǵy retinde qyzmet etedi. Almaty aglomerasıasynyń qanshalyqty úlken ekenin bárimiz túsinemiz – 3,2 mıllıon adam. Bul ekologıaǵa, jol qozǵalysyna, júktemege áser etedi. Sol sebepti, bizge jumys kúshi men turǵyn úı qoryn Almatydan tartyp ala alatyn, sapasy jaǵynan kem túspeıtin aýmaq qajet. Alataý úshin bólek zań qabyldanady, onyń aıasynda elimizde buryn qoldanylmaǵan tetikter engiziledi. Sonyń biri – krıptovalúta arqyly tólem jasaýǵa múmkindik beriledi, – dedi Súleımenov.
Alataý Almaty qalasynyń ortalyǵynan shamamen 47 shaqyrym soltústikte ornalasqan. Jańa qala QR Úkimetiniń 2024 jylǵy 9 qańtardaǵy qaýlysyna sáıkes Alataý aýylynyń bazasynda qurylǵan.
Jańa qalanyń quramyna 12 aýyl endi: Zarechnoe, Arna, Jetigen, Eńbek, Janaarna, Quıǵan, Janadaýr, Janatalap, Yntymaq, Qoıanqus, Dáýlet jáne Qaırat.