Almaty qalasynyń Alataý aýdanyndaǵy komúnıtı ortalyǵynda «Sybaılas jemqorlyqqa qarsy volonterlik» jobasynyń front-ofısi ashyldy. Joba Almaty qalasy ákimdigi men QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń qoldaýymen júzege asyrylyp keledi, dep habarlaıdy aqshamnews.kz
Ashylý rásimine QR Sybaılas jemqorlyqqa qarsy is-qımyl agenttiginiń Almaty qalasy boıynsha departamenti Prevensıa basqarmasynyń basshysy Qanat Sálimbaev, belsendi volonterler men qoǵam ókilderi qatysty.
Saltanatty shara barysynda Qanat Sálimbaev joba aıasynda atqarylǵan jumystarǵa toqtalyp, onyń negizgi baǵyttaryn naqtylap ótti. Sonymen qatar, volonterlerge tájirıbelik keńester berip, bastamalaryna sáttilik tiledi.
«Bul front-ofıster jastardyń sybaılas jemqorlyqqa qarsy mádenıetin qalyptastyrýǵa, azamattyq jaýapkershiligin arttyrýǵa arnalǵan mańyzdy alań. Volonterler – qoǵamdyq sanany jańartatyn, ózgeris ákeletin jańa býyn ókilderi», – dedi Qanat Sálimbaev.
Aıta keteıik, joba iske qosylǵannan beri Almaty qalasyndaǵy komúnıtı ortalyqtarynda, joǵary oqý oryndarynda 200-den astam volonter birigip, 10-nan astam semınar, dóńgelek ústel jáne aqparattyq kezdesý ótkizgen. Atalǵan sharalar arqyly 1 000-nan astam azamat qamtyldy. Volonterler qoǵammen tyǵyz baılanysta jumys istep, tek aqparattyq-aǵartýshylyq sharalarmen shektelmeı, naqty nátıjelerge de qol jetkizýde.
Máselen, joba bastalǵaly beri jalpy somasy 2,3 mlrd teńgege baǵalanǵan artyq baǵamen satyp alý áreketteri anyqtalyp, tıisti organdardyń nazaryna usynyldy. Bul – volonterlerdiń sybaılas jemqorlyqtyń aldyn alýǵa baǵyttalǵan naqty úlesiniń aıqyn kórinisi.
Uıymdastyrýshylardyń aıtýynsha, mundaı front-ofıster aldaǵy ýaqytta qalanyń barlyq aýdanynda ashylady. Bul bastama jastardyń belsendiligin arttyryp qana qoımaı, qoǵamda ádildik, ashyqtyq pen senim atmosferasyn qalyptastyrýǵa serpin bermek.