Gıdrologıa beketterin jóndep, jańǵyrtý qajet. Bul týraly Parlament palatalarynyń birlesken otyrysynda Qazaqstan halqyna Joldaýyn jarıalap jatqan Memleket basshysy Qasym-Jomart Toqaev aıtty.
«Irrıgasıa júıeleri jáne jalpy sý sharýashylyǵy máselesimen muqıat aınalysý qajet. Kóktemdegi alapat tasqyn búkil elimiz úshin úlken synaq boldy. Sol qıyn kúnderde biz yntymaǵy jarasqan el ekenimizdi kórsettik. Qazaqstannyń ár aımaǵynan jınalǵan eriktiler men janashyr azamattar zardap shekken jurtqa kómek qolyn sozdy. Meniń eldik isten shet qalmaý týraly úndeýime iri bıznes ókilderi de qoldaý bildirdi. Memlekettiń batyl áreketi men halyqtyń ózara tilektes bolýynyń arqasynda asa qıyn jaǵdaıdan aman-esen óttik. Degenmen ortalyq jáne jergilikti bılik ókilderi osy oqıǵadan sabaq alýy kerek», - dedi Memleket basshysy.
Prezıdenttiń atap ótýinshe, qazirgi zamanda biz kez kelgen qaterge daıyn bolýymyz qajet. Sondyqtan qarǵyn sýdy jınap, dıqandardyń qajetine jaratý úshin ony durys saqtaı bilgen jón. Gıdrologıa beketterin jóndep, jańǵyrtý qajet. Sýdy barynsha únemdeý jumysyn uıymdastyrý kerek. Bul – eń aldymen, aýyl sharýashylyǵyna qatysty másele, ıaǵnı sý únemdeý tehnologıasyn, ásirese, aýyl sharýashylyǵynda keńinen qoldaný qajet.
«Sý qoryn jınap, ony tıimdi paıdalanyp, ırrıgasıa júıesin durys qoldana alsaq, bul salaǵa da ınvestısıa tartýǵa bolady. Sondyqtan tarıf saıasatyn rettep, ınvestorlarǵa tıimdi qoldaý sharalaryn usyný qajet. Bul – Úkimettiń aldynda turǵan mańyzdy mindet. Naqty jumysqa kirisý kerek», - dedi Qasym-Jomart Toqaev.