Qoǵamdyq baqylaý mehanızmi jańa ózgeristermen jetildi. Bul týraly Prezıdenti Ákimshiligi Basshysynyń orynbasary Aıda Balaeva jelidegi paraqshasynda jazdy, dep habarlaıdy Almaty-akshamy.kz QazAqparatqa silteme jasap.
«Memleket basshysy 2019 jylǵy Prezıdent saılaýynan keıin «qoǵamdyq kelisimniń jańa formaty qajet» dep aıtqanyn bilemiz. Ol úshin, árıne, eń aldymen tyń reformalar qajet ekeni túsinikti. Bul rette Prezıdent halyqpen keri baılanysty kúsheıtýdi tapsyryp, «halyq únine qulaq asatyn memleket» tujyrymdamasyn jarıalady. Sonyń nátıjesinde barlyq memlekettik organdardyń ınternettegi jumysy jandanyp, onlaın qoǵamdyq qabyldaýlar tetigi iske qosyldy, birinshi basshylar áleýmettik jeliler arqyly tikeleı baılanysqa shyǵa bastady.
Qoǵamdyq baqylaý mehanızmi jańa ózgeristermen jetildirildi. Onyń negizinde qoǵamdyq talqylaýdan ótken arnaıy zań jobasy ázirlenip, Májilis qaraýyna engizildi. «Adamdar memleket úshin emes, memleket adamdar úshin» degen ustanym negizinde quramyna elge tanymal azamattar, maıtalman sarapshylar, qoǵam belsendileri, saıasattanýshylar engen – Ulttyq qoǵamdyq senim keńesi quryldy.
Memleket basshysy buǵan deıin ashyq demokratıalyq qaǵıdalarǵa negizdelgen saıası reformalardyń 4 paketin usynǵan bolatyn. Atap aıtqanda, «Beıbit jınalystardy ótkizý tártibi týraly», «Saıası partıalar týraly», «Saılaý týraly», «Parlament jáne onyń depýtattarynyń mártebesi týraly», «Aqparatqa qol jetkizý týraly» zańdar qabyldandy. Partıa qurý úshin qol jınaý shegi tómendetildi, Májilis pen máslıhattardaǵy áıelder men jastardyń úlesi kvotamen ósti. Parlamenttik opozısıa ınstıtýty engizildi. Alǵash ret aýyl ákimderin saılaý saıası naýqany sátti ótti. Bul reformany halyq jyly qabyldady, ózderiniń naqty tańdaýlaryn jasady. Kelesi kezekte aýdan ákimderin saılaý mindeti tur», - dedi Aıda Balaeva.
Onyń aıtýynsha, munyń barlyǵy da buryn qoǵam tarapynan jıi aıtylyp júrgen usynystar bolatyn.
«Memleket basshysynyń qoldaýynyń arqasynda olar naqty iske asyp jatyr. Prezıdent jarıalaǵan «estıtin memleket» tujyrymdamasy «naqty máselelerdi sheshý» qaǵıdasyna aýysyp jatyr.
Prezıdent memlekettik basqarýdy jetildirý jumystary júıeli túrde jalǵasatyny birneshe ret aıtqan bolatyn. Memleket basshysynyń búgingi Joldaýynda jarıalanǵan jańashyldyqtar - osynyń kezekti dáleli. Sonyń biri – Ulttyq qoǵamdyq senim Keńesiniń jumys aýqymyn keńeıtip, Ulttyq Quryltaı deńgeıine kóterý. Halyq bolyp birigip, alqa quryp, aqyl qosýdy bildiretin «quryltaı» uǵymy - halqymyz úshin qashan da qasterli túsinik. Sonymen qatar, Parlamenttiń Úkimettiń aldyndaǵy esep berý tetigi kúsheıedi. Saıası partıa qurýdyń shekti mólsheri taǵy da qysqardy. Endigi jerde partıa qurý úshin el aýmaǵynda 5000 qol jınasa jetkilikti. Májilis pen máslıhat depýtattaryn partıalyq tizimmen qatar, majorıtarly júıemen saılaý júıesi engiziledi. Bul sóz joq, halyqtyń ózi saılaǵan depýtattary arqyly Parlament minberinen Úkimetke naqty máselelerin estirtý múmkindigin keńeıtip otyr.
Prezıdentimiz aıtqandaı, Qazaqstan saıası modernızasıa kýrsyn júıeli túrde jalǵastyra beretin bolady. Osylaısha kezekti saıası reformalardyń sátti iske asýy qoǵamdy odan ary demokratıalandyrýǵa yqpal etedi. Eń bastysy, «Jańa Qazaqstandy birge qurý» jolynda el bolyp birigip, qoǵam bolyp jumylyp uıymshyldyq tanyta bilý qajet», - dep tolyqtyrdy ol.