Dárigerler onyń oń aıaǵynyń birneshe jerine temir salyp, ota jasaǵan
Almaty qalasynyń Medeý aýdandyq polısıa bóliminiń ýchaskelik polısıa qyzmetkeri Ulan Ohanov 31 arnanyń “Informbúro” aqparattyq baǵdarlamasynyń tilshilerine suhbat berdi, dep habarlaıdy Almaty-akshamy.kz.
Ol qaladaǵy Tóle bı men Baıtursynov kósheleriniń qıylysynda adamdardy qýyp júrip qaqqan kólikten zardap shegip, aıaýsyz soqqyǵa jyǵylǵan.
Ulan Ohanovtyń aıtýynsha, quqyq qorǵaý qyzmetkerleri art jaqtan kelgen áskerı kólikti kómekke kelgen áriptesteri eken dep oılaǵan.
«Alystan qaraǵanda kólik tizgininde qara kıim kıgen adam otyrǵanyn kórip, óz qyzmetkerimiz dep oıladyq. Soqqydan ushyp kettim. Turaıyn desem, tobyǵym taıyp ketken eken, aıaǵymdy kórip, talyp qaldym», – deıdi Ulan Ohanov.
Osydan keıin Ulandy áriptes eki dosy joldyń shetine shyǵaryp, aǵashqa súıegen.
«Tastap ketińder, júrýge shamam joq» dep aıtyp úlgerdim. Taǵy bir esimdi jıǵanda baıqaǵanym, formamnan súıregen áldekimder sol mańda ornalasqan «Halyq bank» ǵımaratynyń ishine qaraı apara jatyr eken. Ol jaqta polısıa qyzmetkerleri men áskerılerdi jabylyp uryp jatty. «Kıimińdi shesh» dep jatqanyn, bir úlken kisiniń «qazaqtyń balasy ǵoı, tıispeńder» dep júgirip, jylap júrgenin kórdim. Biraq ony úlken kisi dep tyńdap jatqan eshkim joq», – dep esine aldy polısıa qyzmetkeri.
Ulan Ohanov soqqydan esinen tanyp, aýrýhanada ǵana óz-ózine kelgen. Dárigerler onyń oń aıaǵynyń birneshe jerine temir salyp, ota jasaǵan. Oǵan qosa mıy shaıqalyp, sol qolynan jaraqat alǵanyn aıtty. Ol aýrahanada jatqan 15 kúnde 15 keli salmaq joǵaltqan. Ulan ózin emdeý mekemesine aparǵan belgisiz azamatqa alǵysyn bildirdi.
İİM Tergeý departamentiniń tóraǵasy Sanjar Ádilovtyń aıtýynsha, qańtar oqıǵasy kezinde jalpy sany 3 myńnan astam áskerı, quqyq qorǵaý salasynyń qyzmetkerleri túrli jaraqattarmen aýrýhanaǵa túsken.
«Olardyń keıbiri qyzmetine orala almaıdy, múgedek bolyp qaldy», – dedi İİM Tergeý departamentiniń tóraǵasy.