Almaty – arý qala. Onyń kórkemdigin asyryp turǵan, sózsiz, jasyl jelekteri. Biraq búgingideı ystyqta olarǵa kútim kerek. Al kútimsiz jasyl jelekter qýrap ketedi, saldarynan aınalamyz súreńsiz tartady.
Almaty qalasynyń Bostandyq aýdanynda 1986 jylǵy Jeltoqsan oqıǵasynyń qatysýshylary da «Aǵashtarǵa qamqor bol!» qoǵamdyq aksıasyn qoldap, Abaı dańǵylynyń boıyndaǵy jasyl jelekti sýǵarýǵa qatysty.
«Biz qalamyzdyń kórikti de taza, aǵashtary jaıqalǵan jasyl qala kelbetinen aıyrylmaǵanyn qalaımyz jáne barlyq almatylyqty osy aksıaǵa qatysýǵa shaqyramyz», – deıdi olar.
Esterińizge sala keteıik, shaharda mekeme-kásiporyn ókilderiniń, turǵyndardyń ózderi ornalasqan aýmaqtaǵy aǵashtardy kútimge alý chellendji bastalǵan bolatyn. Búginde almatylyqtardyń atalmysh aksıaǵa qatysý belsendiligi joǵary.