Mundaı málimetterdi Almaty qalasynyń kóshi-qon qyzmeti bes aıdyń qorytyndysy boıynsha keltirip otyr.
Bólimsheniń málimetinshe, jyl basynan beri Afrıka elderiniń 64 azamaty ustaldy, onyń ishinde 55 Nıgerıa, 5 Kamerýn, 2 Ońtústik Afrıka jáne Kot-d’Ivýar men Serra-Leone bir-bir azamaty.
«Olardyń 12-si sot sheshimimen Qazaqstan Respýblıkasynan shyǵaryldy. Tájirıbe kórsetkendeı, Afrıka qurlyǵy elderi azamattarynyń kópshiligi Qazaqstanǵa týrısik, jumys nemese oqý vızalarymen keledi. Alaıda olardyń birazy ýaqytynda ketpeı, Qazaqstan Respýblıkasynyń kóshi-qon zańnamasyn buzyp otyr. Aıtpaqshy, Almatyda ótken respýblıkalyq “Nelegal” is-sharasy kúnderinde sheteldikterdi shaqyrýshy tarap qyzmetin atqaryp, qonaqtardyń óz eline der kezinde ketýin qamtamasyz etpegen 5 fırma anyqtaldy. Bul zańdy tulǵalar QR ÁQBtK-niń 518-baby boıynsha jaýapkershilikke tartyldy. Taǵy bir jeke kásipker osyndaı zań buzýshylyqtyń qaıtalanýyna baılanysty shetel azamattaryn shaqyrý lısenzıasynan aıyryldy», – dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.
Sonymen qatar is-shara kúnderinde sheteldik jumys kúshin qaıta tartýdyń 2 deregi anyqtaldy jáne joly kesildi.