Osy maqsattarǵa búdjetten 59,4 mlrd teńge bólindi.
Qazaqstan Úkimeti jyl basynan beri qansha qazaqstandyq áleýmettik kómek alǵanyn jetkizdi, dep habarlaıdy Almaty-akshamy.kz.
«2022 jylǵy 1 jeltoqsandaǵy jaǵdaı boıynsha, 140,6 myń otbasyndaǵy 724,1 myń adamǵa ataýly áleýmettik kómek taǵaıyndaldy. Bıyl osy maqsattarǵa búdjetten 59,4 mlrd teńge bólindi», - delingen Eńbekmıni baspasóz qyzmetiniń habarlamasynda.
AÁK otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady.
Budan basqa, AÁK kórsetýdiń jańa tetigin iske asyrý sheńberinde elimizdiń barlyq óńirinde tabysy az otbasylardyń mektep jasyna deıingi balalaryn kepildendirilgen áleýmettik toptamamen (budan ári – áleýmettik toptama) qamtamasyz etý boıynsha jumys júrgizilýde.
2022 jylǵy 1 jeltoqsanda AÁK alýshylar qataryndaǵy 1 jastan 6 jasqa deıingi 191,1 myń balaǵa azyq-túlik jáne turmystyq hımıa jıyntyǵy túrinde áleýmettik toptama taǵaıyndaldy.
Azamattardyń áleýmettik toptamany zattaı formattan aqshalaı formatqa aýystyrý týraly usynystaryn eskere otyryp, 2023 jyldan bastap mektep jasyna deıingi balalar úshin kepildendirilgen áleýmettik toptamany monetızasıalaý júzege asyrylatyn bolady. Ónimder men turmystyq hımıa jıyntyǵyn usynýdyń ornyna ár balaǵa 1,5 AEK mólsherinde qosymsha tólem belgilenedi. Osylaısha, ata-analarǵa balalardyń jeke qajettilikterine qaraı óz betinshe azyq-túlik satyp alý múmkindigi beriledi.