Astanada Halyqaralyq volonterler kúni aıasynda «Jyl volonteri» halyqaralyq syılyǵynyń jeńimpazdaryn marapattaý rásimi ótti.
İs-sharaǵa QR Parlamenti Májilisiniń depýtattary Vera Kım, Konstantın Avershın, Mádenıet jáne aqparat vıse-mınıstri Danıar Qadyrov, Tótenshe jaǵdaılar vıse-mınıstri Erlan Nurpeıisov, Ózbekstan Respýblıkasynyń Qazaqstandaǵy Tótenshe jáne Ókiletti Elshisi Saıdıkram Nıazhodjaev, BUU-nyń Eýropa jáne TMD elderi boıynsha eriktiler baǵdarlamasynyń óńirlik menedjeri Rımma Sabaeva qatysty, dep habarlaıdy Almaty-akshamy.kz.
Halyqaralyq volonterler kúni aıasynda Mádenıet jáne aqparat mınıstri Aıda Balaeva áleýmettik jelide úndeý jasady.
«Qazaqstanda volonterlik qozǵalys belsendi damyp keledi jáne qoǵam ómirinde úlken ról atqarady. Volonterler qozǵalysyn belsendi qoldaıtyn Memleket Basshysynyń bastamasymen 2020 jyl «Volonter jyly» atalyp ótti. Sońǵy 3 jylda qabyldanǵan sharalar volonterlik uıymdardyń 3 ese, belsendi volonterlerdiń 5 ese oń ósý serpinine yqpal etti. Elimizde 700-ge jýyq volonterlik uıym, 1000-nan astam bastamashyl toptar jáne 1000-nan astam «Kúmis volonter» bar. Osy kezeńde 300 myńnan astam túrli formattaǵy is-sharalar ótkizildi. Volonterlik qoǵamdastyq ókilderiniń, bıznes-qurylym ókilderiniń, jastardyń qatysýymen volonterlik qyzmet taqyryby qazaqstandyqtardyń kúndelikti ómirine jáne jańalyqtardyń kún tártibine engizildi. Buǵan BAQ-ta jarıalanǵan 200 myńnan astam túrli materıaldar dálel bola alady»,- dep atap ótti óz úndeýinde mınıstr.
Áleýmettik mańyzy bar 15 nomınasıa boıynsha jeńimpazdar anyqtaldy.
«Úzdik volonterlik uıym» nomınasıasy boıynsha «Volontery Astany LIDER.KZ» QB jeńimpaz atandy. 7 jyl ishinde uıymnyń volonterleri quldyqtan 120 adamdy qaıtaryp alyp, 2000 adamdy izdestirdi.
«Tótenshe jaǵdaılardy joıýǵa belsendi qatysqany úshin» nomınasıasy boıynsha «Zerek» qoǵamdyq qory (Túrkistan oblysy) úzdik dep tanyldy. Sondaı-aq, atalǵan qor «TJ volonterligi: Jaqsylyq jasa» jobasyn júzege iske asyrdy.
«Densaýlyq saqtaýdy damytýǵa belsendi qatysqany úshin» nomınasıasyn Ózbekstannan kelgen Jasúrbek Kamılov jeńip aldy. Ol «Jaqsylyq jasa» qaıyrymdylyq tobyn ashyp, onda halyqqa, jalǵyzbasty qarttarǵa, az qamtylǵan otbasylarǵa qajetti dári-dármekterdi satyp alýǵa kómektesý úshin stýdentterdi jınady.
«Tarıhı-mádenı muralardy saqtaýǵa jáne damytýǵa qosqan úlesi úshin» nomınasıasy boıynsha 200-den astam aýqymdy is-sharalar uıymdastyrǵan «Altyn Adam Jetisý sheberler ortalyǵy» qoǵamdyq birlestigi jeńimpaz atandy.
Esterińizge sala keteıik, «Jyl volonteri» syılyǵy volonterler qozǵalysyn damytýǵa jáne qoldaýǵa eleýli úles qosqan otandyq jáne halyqaralyq volonterlerdi kótermeleýge jáne yntalandyrýǵa baǵyttalǵan.
Sońǵy úsh jylda elimizdiń ár óńirinen, sondaı-aq Ózbekstan, Qyrǵyzstan jáne Reseıden kelgen 185 volonter syılyqtarmen marapattaldy.