«Qazaqstan arýy» baıqaýyna qatysýǵa elimizdiń túkpir-túkpirinen 20 myń arý ótinim bergen
Almatyda «Qazaqstan arýy-2022» baıqaýynyń fınaly ótti, dep habarlaıdy Almaty-akshamy.kz QazAqparatqa silteme jasap.
Bıyl elimizdiń alǵashqy sulýy ataný quqyǵyna 23 boıjetken talasty.
Onyń ishinen birinshi kezeńde 12, sodan keıin – eń úzdik bes qatysýshy irikteldi, qazylar alqasy sonyń ishinen jeńimpaz ben laýreattardy tańdap aldy.
Olar álemniń tórt basty sulýlyq baıqaýyna qatysady.
«Qazaqstan arýy» ataǵyn jáne «Álem arýyna» joldamany Astanadan kelgen 24 jastaǵy Tomırıs Kákimova jeńip aldy. Oǵan sondaı-aq 5 mln teńgeniń sertıfıkaty berildi.
Tomırıs L.Gýmılev atyndaǵy Eýrazıa ulttyq ýnıversıtetin «halyqaralyq quqyq» mamandyǵy boıynsha bitirgen. Keıin Kókshetaý ýnıversıtetinde quqyqtaný magıstri dárejesin aldy.
Endi Tomırıs Kákimova «Álem arýy» halyqaralyq baıqaýynda el namysyn qorǵaıdy.
Sondaı-aq «Álem arýy Qazaqstan» tájin jáne «Álem arýyna» joldamany 19 jastaǵy almatylyq Dıana Táshimbaeva enshiledi.
«Jershary arýy Qazaqstan» ataǵy men álem konkýrsyna joldama 19 jastaǵy almatylyq Dılnaz Tılaevaǵa buıyrdy.
19 jastaǵy Tomırıs Zaır «Qazaqstan vıse-arýy» atandy.
Kórermen kózaıymy syılyǵyna Semeı qalasynan kelgen 18 jastaǵy Altynıa Ǵazızova ıe boldy.
Sońǵy kezeń birneshe jarystan turdy. Qatysýshylar ártúrli kıim men sýrette jeke jáne toptyq defıle kórsetti, sodan keıin suraqtarǵa jaýap berdi.
Qazylar alqasynyń quramynda prodúser Jan Muqanov, aktrısa Arýjan Jazylbekova, bloger jáne kópbalaly ana Dana Eseeva, telejúrgizýshiler Dınara Sátjan men Aıdaı Isaeva, sondaı-aq belgili ýkraındyq ánshi Svetlana Loboda boldy.
Aıta keteıik, Qazaqstan arýynyń táji bıyl jańardy - ol Armenıada kúmisten, platınadan jáne 600 sırkonıı tasynan jasalǵan.
«Qazaqstan arýy» baıqaýyna qatysýǵa elimizdiń túkpir-túkpirinen 20 myń arý ótinim bergen.