Elimizde QazTech platformasy bazasynda biryńǵaı ortalyqtandyrylǵan qoıma qurýdy kózdeıtin bilim berý derekteriniń jańa arhıtektýrasy engizildi, - dep habarlaıdy Aqshamnews.kz.
Bul týraly Úkimettiń qorytyndy baspasóz máslıhaty aıasynda oqý-aǵartý vıse-mınıstri Asylbek Ahmetjanov málimdedi.
Ol Memleket basshysynyń salany tereń sıfrlandyrý jónindegi tapsyrmasy boıynsha 2026 jyldyń sońyna deıin oqytýdy basqarýdyń barlyq júıesi jańǵyrtylǵan Ulttyq bilim berý derekter bazasymen (UBDB) ıntegrasıalanatynyn atap ótti.
«Jeke LMS-te jyldar boıy jınaqtalǵan derekterdi biz memlekettik derekter bazasynda jınaqtaımyz. Bul, mysaly, ártúrli LMS túrleri Qoldanylatyn óńirlerde oqýshylardy mektepten mektepke aýystyrý prosesin jeńildetedi», - dep atap ótti Asylbek Ahmetjanov.
2025 jyldyń qorytyndysy boıynsha elimizdegi mektepterdiń 99%-y ınternet jelisine qoljetimdilikpen qamtamasyz etildi. Prezıdenttiń qala men aýyl arasyndaǵy sıfrlyq alshaqtyqty joıý jónindegi tapsyrmasyn oryndaý úshin 1 608 shalǵaıdaǵy mektep Starlink spýtnıktik tehnologıasyna qosyldy.