Qazaqstannyń oqý-aǵartý mınıstrligi kelesi jyly jańa bilim berý standartyn engizýdi josparlap otyr. Bul týraly sońǵy kezderi kóptegen muǵalimder áleýmettik jelilerde óz alańdaýshylyqtaryn bildirip, jıi jazýda. Ázirge resmı qujattar jarıalanbasa da, sheneýnikterdiń aıtýynsha, jańa standarttar oqytý prosesin sapaly ári qyzyqty etýge baǵyttalǵan, dep habarlaıdy aqshamnews.kz
Jospar boıynsha kelesi ózgerister engizilýi múmkin:
1. Jasandy ıntellekt bilim berý prosesine engiziledi:
- Vırtýal laboratorıalar: oqýshylar úshin tájirıbeler men zertteýlerdi vırtýaldy túrde júrgizýge múmkindik beredi.
- Tildik qosymshalar: oqýshylardyń tilderdi tıimdi meńgerýine kómektesetin baǵdarlamalar.
- Aqparattyq júıeler: jaratylystaný ǵylymdary boıynsha mýltımedıalyq prezentasıalar bazasyn qurý, bul sabaqtardy qyzyqty ári kórneki etedi.
2. Mektep pánderi biriktiriledi:
- Jaratylystaný páni: hımıa, fızıka jáne bıologıa bir pán retinde oqytylady.
- Áleýmettik ǵylymdar páni: dúnıe júzi tarıhy men quqyq negizderi biriktiriledi.
- Matematıka: algebra men geometrıa birge oqytylady.
3. Jańa pánder engiziledi:
- 3D-modeldeý: oqýshylarǵa úsh ólshemdi modelder jasaý daǵdylaryn meńgertý.
- Baǵdarlamalaý: bolashaq mamandar úshin mańyzdy pán.
- Grafıka dızaıny: shyǵarmashylyq pen tehnıkalyq bilimdi ushtastyratyn pán.
- Generatıvti jasandy ıntellekt: qazirgi zamanǵy tehnologıalardy meńgerýge arnalǵan pán.
4. Shahmat páni mindetti bolady:
Barlyq orta mektepterde shahmat sabaǵy engiziledi, bul strategıalyq oılaý qabiletin damytýǵa baǵyttalǵan.
5. Qarjylandyrý:
Qazaqstan Respýblıkasynyń oqý-aǵartý salasyna bólinetin qarjy mólsheri de aıtarlyqtaı artyp otyr:
- 2025 jyly respýblıkalyq búdjetten 1 108,1 mıllıard teńge bólinedi. Onyń ishinde bilim sapasyn arttyrýǵa – 903,24 mıllıard teńge, tehnıkalyq jáne kásibı bilimdi kadrlardy daıarlaýǵa – 90,58 mıllıard teńge baǵyttalady.
- 2026 jyly bul soma 413,59 mıllıard teńge bolady, onyń ishinde bilim sapasyn arttyrýǵa – 193,25 mıllıard teńge, al tehnıkalyq jáne kásibı bilimdi kadrlarmen qamtýǵa – 100 mıllıard teńge bólinedi.
Bul jańalyqtar bilim berý júıesin zamanaýı talaptarǵa saı jetildirýge baǵyttalǵan. Árıne, jańa standarttardyń iske asýy muǵalimder men oqýshylarǵa jańa múmkindikter men mindetter ákelmek.