QR Oqý-aǵartý mınıstrligi balalardy qosymsha bilimmen qamtýdy arttyrý boıynsha josparly jumys júrgizýde.
2025 jylǵa deıin balalardyń shyǵarmashylyq jáne zıatkerlik áleýetin damytý úshin 50 balalar saýyqtyrý ortalyǵyn ashý jáne keminde 100 zamanaýı nysan salý kózdelgen. Bul týraly qosymsha bilim berý salasyndaǵy respýblıkalyq semınarda Oqý-aǵartý vıse-mınıstri Edil Ospan málimdedi, dep habarlaıdy Almaty-akshamy.kz Oqý-aǵartý mınıstrligine silteme jasap.
«Balalardyń quqyqtarynyń saqtalýyn qamtamasyz etý - memlekettik saıasattyń negizgi mindeti bolyp tabylady. Óńirlerde oqýshylar men olardyń ata-analarynyń qajettilikterine baǵyttalǵan tárbıe berý júıeleri tabysty jumys isteýde. Qosymsha bilim berý - balalar men jasóspirimder arasynda quqyq buzýshylyqtar men basqa da jaǵymsyz qubylystardyń aldyn alýda mańyzdy ról atqarady. Osy boıynsha ınfraqurylymdy damytýdy jalǵastyrý qajet»,- dep atap ótti QR Oqý-aǵartý vıse-mınıstri.
Semınarda qatysýshylar tájirıbe almasyp, óńirlerdegi qosymsha bilim berý uıymdarynyń úzdik tájirıbelerimen tanysty. Usynylǵan jobalar men baǵdarlamalar qatysýshylarǵa balalar men jasóspirimderdi oqytý men tárbıeleýdiń ártúrli tásilderimen tanysýǵa múmkindik berdi. Aıta keteıik, búginde elimizde 1713 qosymsha bilim berý uıymy, 380 túrli úıirme jumys isteıdi. Oqýshylardy qamtý deńgeıi 81,6% quraıdy.