Sonymen birge, taý-ken ónerkásibindegi kórsetkish 0,9%-ǵa tómendegen.
2022 jyldyń qańtar-qarasha aralyǵynda ónerkásiptegi óndiris kólemi 2021 jyldaǵy kezeńmen salystyrǵanda 101,4%-ǵa jetti. Bul týraly Almaty-akshamy.kz Indýstrıa jáne ınfraqurylymdyq damý mınıstrligine silteme jasap habarlaıdy.
Bul ósim óńdeý (4,2%), metalýrgıa (3,9%), mashına jasaý (8,9%) jeńil ónerkásip (6,9%), sondaı-aq tústi metal kenderin óndirý salasyndaǵy (5,9%) óndiris kóleminiń ulǵaıýy esebinen baıqalyp otyr. Sonymen birge, taý-ken ónerkásibindegi kórsetkish 0,9%-ǵa tómendegen.
Byltyr Indýstrıa jáne ınfraqurylymdyq damý mınıstrligi ónerkásiptegi sıfrly tehnologıalardy engizýge baılanysty yntalandyrýdyń tyń tetikterin qosty. Bul ónerkásiptik-ınnovasıalyq qyzmet sýbektileriniń eńbek ónimdiligin arttyrýǵa septigin tıgizýi tıis.
Ónerkásipke memlekettik yntalandyrý sharalaryn usyný qaǵıdalaryna sáıkes shyǵyndardy óteý Indýstrıa 4.0 tehnologıalaryn engizýge jáne avtomattandyrylǵan basqarý júıelerin ázirleýge nemese qoldanysqa engizýge (onyń ishinde, lısenzıalyq baǵdarlamalyq qamtamasyz etýdi satyp alýǵa) beriledi. Qazir 6 ónerkásiptik kásiporyn IT sheshimderge jumsalǵan shyǵyndardyń ornyn toltyra aldy.
Sonymen qatar, mınıstrlik satyp alynatyn jabdyq qunynyń 50% (750 mln teńgeden aspaıtyn) mólsherine deıin tehnologıalyq jabdyqty jańǵyrtýǵa arnalǵan ónerkásiptik grantty usyný arqyly óndiris oryndaryn qoldaýdy jalǵastyryp keledi. 2023 jyly respýblıkalyq búdjetten atalǵan grantty usynýǵa 1,6 mlrd teńge qarastyrylǵan.
Buǵan qosa, vedomstvo ónerkásipti qoldaýdyń qosymsha sharalary retinde 2023 jylda birqatar is-sharany josparlap otyr. Onyń ishinde, Astana Mining&Metallurgy-2023 (Halyqaralyq taý-ken metalýrgıa kongresi) forýmy men sheteldik delegattardyń qatysýymen Qazaqstan mashına jasaýshylarynyń XI forýmyn ótkizý jospary bar.
Astana Mining&Metallurgy – taý-ken ındýstrıasyndaǵy aýqymdy is-sharalardyń biri sanalady. Onyń dıalog alańynda B2B jáne G2B formatynda jer qoınaýyn ıgerýmen aınalysatyn iri kompanıalar men Qazaqstannyń memlekettik qurylymdarynyń ókilderi kezdesip, salalyq kórme, netvorkıng jáne «Altyn Gefest» salalyq baıqaýy ótkiziledi. Jyl saıyn uıymdastyrylatyn kongres salaaralyq ınvestısıalyq baılanysty keńeıtýge, jańa kelisimsharttar jasaýǵa jáne zamanaýı syn-qaterlerge birlesken sheshimderdi ázirleýge áserin tıgizip keledi.
Al, Qazaqstan mashına jasaýshylar forýmynyń mańyzdylyǵy sol, munda avtokólik óndirisinen bólek, elimizdiń óńdeý ónerkásibin damytý strategıasy qalyptastyrylyp, salalyq kásiporyndardy arzan baǵadaǵy shıkizatpen qamtamasyz etýdiń jáne jergilikti qamtýdy damytýdyń jańa tetikteri qarastyrylady.
Sonymen qatar, bıyl qazaqstandyq kásiporyndardyń el aýmaǵy men Reseıde jáne Ózbekstanda ótkiziletin «INNOPROM» kórmesi aıasyndaǵy túrli aýqymdy is-sharalarǵa qatysýy josparlanǵan.