Oǵan elimizdegi barlyq óńirdiń 965 mektebi men 35 kolejin qosa alǵanda 1000 oqý orny qatysty.
Bıyl 6 qarasha men 15 jeltoqsan aralyǵynda Qazaqstanda «Mektepterge arnalǵan PISA-2023» halyqaralyq zertteýi aıaqtaldy, dep habarlaıdy almaty-akshamy.kz.
«Ekonomıkalyq yntymaqtastyq jáne damý uıymynyń (EYDU) «Mektepterge arnalǵan PISA» zertteýi jeke mektep deńgeıinde 15 jastaǵy oqýshylardyń oqý, matematıka jáne jaratylystaný pánderi boıynsha fýnksıonaldyq saýattylyǵyn salystyrady. Zertteýge 436 qalalyq jáne 564 aýyldyq bilim berý uıymdarynan 33 myńnan astam oqýshy qatysty. Zertteý nátıjeleri boıynsha bilim berý uıymdary PISA zertteýine qatysqan elimizdiń jáne álemniń basqa mektepterimen salystyrylǵan nátıjeleri týraly esep alady. Budan basqa, esepterde bilim alýshylardyń oqý úlgerimine, ıaǵnı, olardyń áleýmettik jáne emosıonaldyq daǵdylaryna, oqý prosesine degen qyzyǵýshylyǵyna jáne mektep/kolejdge kózqarasyna jáne t.b. áser etetin faktorlarǵa taldaý jasalynady», - dedi QR Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Ernur Dáýenov.
Árbir mektep 2024 jyldyń ekinshi jartyjyldyǵynda bilim sapasyn jaqsartý jáne taldaý úshin qundy aqparattary bar esepterdi alady. Eske salaıyq, Mektepterge arnalǵan PISA-2022 nátıjeleri boıynsha 1000 bilim berý uıymyna 428 jeke jáne 172 toptyq esep berilgen.